September 2, 2023 (Rauthla) : Lawngtlai Auto Rick-Shaw Owner’s Association chuan Date 01.09.2023 tlailam an member F. Biakhlupuia'n tu tih hriat loh kut a tuar chu pawi an tih thu leh pawikhawihtute hi a rang thei ang ber a chhuichhuak a hremna pe ngei turin Lawngtlai Police an phut thu an sawi.
LAROA in hemi chungchanga thuchhuah an siamah date 01.09.2023 tlailam 5:30 PM vel khan an member Biakhlupuia s/o F. Zoramliana auto rickshaw chu MRB Bazar bul atangin KMMTTP road ah mi pathumin hmangin Electric Veng leh L-IV inrina lai velah a passenger te a drop hnuin a rawn let leh chu a motor a chiang lova. A motor siam lai chu tu tih hriatlohten a hnunglam atangin an rawn bei thut a. A hnung an khirh a,a hmai an tuam sak nghal a, thil eng emaw an barh a, ‘I lem vek loh chuan kan that ang che’ tiin an vau zui a. Vawithum lai an barh zui a. Hemi hnu hian nikhua hre lovin hun eng emaw chen a awm hnuin a lo harh deuh hnuah Lawngtlai Auto-Rickshaw Owner’s Assocation Fin. Secretary chu phone a rawn biain, a awmna hmun te hrilhin an va hruai ta a. Nizan ah District Hospital, Lawngtlai ah kalpui niin, District Hospital-ah enkawl ani. Biakhlupuia hi tukin zingah Hospital atanga chhuah tir ani.
LAROA chuan an member F. Biakhlupuia tawhsual tawh chungchangah hian a chhung ten Lawngtlai Police Station-ah F.I.R an thehlut nghal thu sawiin, Lawngtlai Police te chuan he pawikhawihtute hi a rang thei ang ber a chhuichhuak a hremna pe ngei turin an phut tih an sawi bawk.
LAROA hruaitute sawi danin, he pawikhawihtute hi an tawng hman atangin hnam dang mi ngei an ni a hriat ani.
Post a Comment