August 21, 2023 (Rauthla) : MHIP Gen. Hqrs. chuan Social Media a tha lo zawnga hman vanga hrem tawk tunhnaiah kan awm fo ta chu pawi an tih thu an sawi a, mitin te Social media kan hman danah fimkhur turin an ngen.
MHIP Gen. Hqrs. chuan IT Act 67A in a sawi angin Sex Video/thlalak thehdarh kawngah, account neitu in ama duhthu ngeia a thehdarh emaw, mi Sex Video/thlalak lo thehdarh sak emaw chu vawi khatnaah kum 5 thleng lungin tan leh cheng nuai 10 thleng chawi tir theih tih an sawi a, hrem nawn a nih chuan kum 7 lungin tan leh cheng nuai 10 thleng chawi tir theih a ni. Social media hman dik loh kawngah IT Act angin hrem theihna dan hrang hrang a awm a, khawvel thiamna hmangin kan Police ten rang takin an chhuichhuak thei zel tawh tih an sawi bawk.
MHIP Gen. Hqrs. chuan naupang chunga pawngsual, kutthlak leh khuaikhemna thleng a awm ta zeuh zeuh tih sawiin, pawikhawihtu chu kumtling lo pawh nise Juvenile Justice Act 2015 hmangin hrem theih a ni a, kum tling a nih chuan POCSO Act, 2012 hmangin kum tam tak lungin tan leh pawisa chawi tir theih a ni tih sawiin, hemi kawngah pawh hian mipuite fimkhur turin an chah a, nu leh pa te pawhin kan tu leh faten pawi an khawih loh nan nasa zawk a in zirtir thar leh turin chhungtin te an ngen thar leh bawk a ni.
Post a Comment