August 9, 2023 (Rauthla) : MNF Thalai chuan MNF chuan kan ram leh hnam, kan sakhua himna hi a ngaih pawimawh ber a nih avangin Parliament session kalmek a sawrkar rintawk lohna (No Confidence Motion) eptu party ten an putluh hi huai takin a thlawp dawn, an ti.
MNF Thalai chuan thuchhuah siamin, Sorkar laipui in Manipur tualchhung buaina a chinfel theihloh avanga eptu party tangrual ten Lok Sabha session neih mek a, 'No Confidence Motion' an put luh chu debate neih mek a ni a, hemi chungchang ah hian Mizoram chhunga eptu party thenkhat te’n mipui rilru hruaikawi theih beisei a thudiklo an vawrh darh hi Mizo National Youth Front (MNYF) Headquarters chuan pawi a ti in, thudiklo hmang a mipuite bum hreh lo political party kan la awm hi Mizo kan nihna ang pawhin zahthlak a ti hle a ni, an ti a. India ram rorelna in sang, parliament monsoon session neih mek a sawrkar rin tawk lohna ‘No Confidence Motion’ lut hi August ni 8 atanga ni 10 chhungin parliament house-ah la sawiho chauh tur a ni a, No Trust Motion debate hi neih tan chauh niin Prime Minister pawhin motion reply a la neih loh bakah; vote lakna a la awm lo hrim hrim a ni. Hetiang a nihlai a Congress leh ZPM party ten mipui rilru hruaikawi tum a, "MNF MP te'n BJP an thlawp," tih thudiklo mipui hnena an thehdarh hi MNYF Headquarters chuan tenawm kan ti hle a ni, an ti bawk.
MNF chuan kan ram leh hnam, kan sakhua himna hi a ngaih pawimawh ber a nih avangin eptu party tangrual in Lok Sabha session kalmek a sawrkar rintawk lohna (No Confidence Motion) an putluh hi MNF chuan a thlawp dawn tih zoram mipui hriat ah kan puang a. Kum 20 chhung silai hmang a India sawrkar lo do ngam tawh Pu Zoramthanga kaihhruai MNF hian kan ram leh hnam, kan sakhaw tana pawi thei turah chuan NDA emaw, BJP emaw pawh nise a do ngam hle tih zoram mipui ten an hriat kan duh bawk a ni, an ti a. Mizo Nationalism maicham a hlan thianghlim tawh MNF hian kan ram, kan hnam leh kan kristianna kalh thil reng reng chu a tawp thlengin a dodal zel dawn a, Mizoram mipui zawng zawngte pawh kan ram leh hnam tana tanrualpui ah MNF chuan a sawm takzet che u a ni, tiin nimin khan thuchhuah an siam.
Post a Comment