August 28, 2023 (Rauthla) : Vawiin tlai khan Central Young Lai Association (CYLA) hruaitute chuan Chief Minister Pu Zoramthanga chu a office-ah lengin, CYLA-in kum 2024 a Golden Jubilee an lawmna turah hma lakpui turin CM hi an ngen a, CM chuan CYLA hruaitute thu thlen chu hmalakna awm tawhte bawhzuia hma lakpui zel a tum thu a lo hrilh. CYLA hruaitute hi Lawngtlai East bialtu MLA, Pu H. Biakzaua, Dy. Speaker-in a ho a ni.
Pu H. Biakzaua, Lawngtlai East bialtu MLA leh CYLA hotute hian CM hnenah hian Kaladan Multi-Modal Transit Transport Project (KMMTTP) hna thawh lai meka ram neitu ten zangnadawmna an la dawn loh avanga harsatna awmte an thlen a. Tin, Lawngtlai East Bialtu MLA-in Phawngpui National Park leh Ngengpui Wildlife Sanctuary chungchanga rawtna a thlen tawh chu an sawiho leh bakah, Lawngtlai district chhunga kan Unau raltlante tanpuina tur leh an mamawhte an thlen bawk.
CM chuan CYLA hruaitute thu thlente hi a chhinchhiah thu leh, thenkhatte chu hmalakna kal mek tawhte niin, an thu thlen dangte pawh en zuia theihtawpa hma lakpui a tum thu a hrilh a ni.
Post a Comment