August 25, 2023 (Rauthla) : Vawiin, August 25, 2023 khan Lawngtlai District Football Association (LDFA) chuan Lawngtlai Deputy Commissioner Conference Hall-ah General Body meeting an nei a. He General Body meeting-ah hian LDFA, Zone FA leh Club atangin mi 37 an tel.
Vawiin meeting chawhma lam hi Pu Elvis Lalthangzuala, Sr. Vice President, LDFA in kaihruaiin, kalkhawmte inlawmna thu a sawi a. Honorary Secretary, Fin. Secretary, Treasurer, LDFA ten season hmasaa LDFA hmalakna leh sum dinhmun report an pe a, Zone FA atangin an hmalakna ngaihthlak a ni bawk.
He huna thusawitu Pu C. Hrangthianga, President, LDFA chuan LDFA in General Body meeting a buatsaih thei chu hmasawnna pawimawh tak a nih thu sawiin, kan ramah football hmasawnna kawng tam takin kan hmu chho mek a, hei hi District hruaitute vang chauh ni lovin Zone FA hruaitu leh club hruaitute, football tuichilh takte vang a ni, a ti a. Zone hruaitu leh Club hruaitu inpe tak takte in awm chhoh zel avangin Lawngtlai football pawhin hma a sawn zel a ni, a ti.
LDFA President chuan football hmasawnna kawnga pawimawh tak coaching lam pawh ngaih pawihmawh a tul thu sawiin, Lawngtlai District in qualified coach panga kan neih thu leh heng coach te hi hmang tangkai thiam turin Zone FA leh Club hruaitute a chah a, dan zawm chungchangah Club hruaitute tang leh deuh turin a chah bawk a. Pu C. Hrangthianga chuan 'pawl kan hruainaah hian kan tan ni lovin kan hruaia tan kan thawk a, kan hmalakna tihlawhtlingtu tur chu kan hruaia te an ni. Hei hi kan naute, kan hruaia te pawh hian an hriat a ngai a ni. Pawk hruaitu kan nih hian a reltu mai ni lovin, a taka thawk chhuaktu kan nih a ngai a ni, a ti bawk.
Chawhnu lam rorelnain chhunzawm a ni a, rorel hi LDFA President Pu C. Hrangthianga'n kaihhruaiin, LDFA hmalakna tur chi hrang hrang rel a ni. Thurel zingah LDFA in Zone Championship buatsaih thin rawh se tih te, AIFF Referee Development Course hi Lawngtlaiah nghah a nih theih nan LDFA in hma la rawh se tih te, Match Commissioner Training buatsaih ni rawh se tih te leh LDFA hnuaia player te hlawh bithliah nise tihte passed a ni.
LDFA hnuaiah hian Zone Football Association 6 leh Affiliated Club 15 a awm mek a ni.
Post a Comment