Lawngtlai 17.08.2023 Mizoram Legislative Assembly Deputy Speaker Pu H. Biakzaua chuan nimin khan Lawngtlai-III leh Lawngtlai Electric Veng lei tla hniam chu a hmunah tlawhin, Bialtu MDC leh District thuneitute leh veng pahnih khawtlang hruaitute nen thil awm dan an thlir ho.

He lai lei tla hniam hi kum 1995 aṭanga inṭan tawh niin, kum 2019 hnu khan a che zui ta rih lo va. Kumin fur khaw chengah rawn che nawn lehin, nizan thleng khan tlem tlemin a chet belh tih khawtlang hruaitute chuan an sawi.


Deputy Sepaker Pu H. Biakzaua hova Lawngtlai-III bialtu MDC Pu T. Lalengmuana, Lawngtlai Bawrhsap Pu H. Lalhmingthanga, Additional Deputy Commissioner Pu Abraham Beirazi Khithie leh veng pahnih hruaitute ṭhu khawm chuan lei tla hniam vanga harsatna thleng chu leilung chanchin hre mite'n a rang lama a hmunah an enfiah theih nan hma lak ṭha an ti a. He lai hmun chhan nan Detail Project Report siam thuai a nih theih nan District Administration lamin buaipui tur ṭul hmasate lo buaipui se an ti a. He lai hmun chhan nana hma lo lak tawh dante thlirin, lei tla hniam chhan nana sawrkar leh khawtlang ṭang rualin tuiluankawr mumal zawk siam te, chhung tinte tuichhe luanna awmze nei zawka ruahman te chu ngaih pawimawh hmasakah neih ṭul an ti a; leilung zir mite'n an enfiah hnuah hma lakna lian zawk a awm theih nan bawhzui ni se, an ti.

Lawngtlai Bawrhsap Pu H. Lalhmingthanga chuan he lai chhiatna thleng chu ngun taka an vil reng thu a sawi a. Thuneitu sang zawkah report hmasa an theh luh tawh thu sawiin, hma lakna tur ṭulte bawhzui zung zung a nih tur thu a sawi.

Tun ṭum lei cheah hian Lawngtlai Electric Vengah chhungkua 23 chu hmun him lamah sawn niin, in ding lai pahnih ṭhiah mek a ni a. Lawngtlai East bialtu MLA, Mizoram Legislative Assembly Deputy Speaker Pu H. Biakzaua chuan hnatlang thingpui lum nan Rs 5,000/- a lo pek tawh bakah, hnatlan chhunzawm ngai a la awm nual avangin vawiin khan Rs 5,000/- a pek belh leh a ni.

Post a Comment

Powered by Blogger.