August 15, 2023 (Rauthla) : Vawiin khan Bualpui Ng Zone Football Association te buatsaih Independence Day Football Tournament chu Vawmbuk YLA khelmualah khelh niin, Lawngtlai District Football Association Sr. Vice President Pu Elvis Lalthangzuala chuan khuallian niin hun a hmanpui.
Khuallian Pu Elvis Lalthangzuala chuan, tunlai infiammite hian kan ngaihdan hi kan thlak a ngai tawh a. Infiamna lama kal tum ten lehkha zir hlamchhiah tur emaw kan ti a, zirna leh infiamna hi a kalkawp theih tih hi kan hre reng a tha a. Tunlai Sports Academy tha reng rengah uluk takin kalpui anih tawh avangin zirna leh infiamna kalkawp pui kan thiam a hun tawh ani, a ti.
Tih tak taka infiamna luhchilh leh hlawhtlin tum te tan chuan insumtheihna, tumruhna, tawrhchhelna, taimakna leh mahni inthunun mi kan nih a ngai tih sawiin, hei hi kan ti thei ngat anih chuan hlawhtlinna kan chang ngei ang, a ti. Tin, tunlai hian kan thalaite zingah ruihhlo avanga harsatna tawk mek an awm a. Heng mite harsatnaah hian infiammite chu luh lo ila, infiamna hmangin ruihhlo hi kan ram atangin pet chhuah kan tum dawn a ni, a ti bawk.
Vawiin Independence Day Football Tournament, Bualpui Ng Zone Football Association ten an buatsaihah hian Vawmbuk FC te chuan 4-3 in Tialdawngilung FC te hnehin Vawmbuk FC te hi an Champion ta ani.
Champion Team Vawmbuk FC te hian Trophy leh Rs. 15,000 an dawng a. Runners Up hian Trophy leh Rs. 10,000 an dawng ve thung a ni.
Vawiin Bualpui Ng Zone Football Association Independence Day Final match ah hian Lawngtlai District Football atangin khuallian Sr. Vice President Pu Elvis Lalthangzuala, khualzahawm Pu Edwin Lalhuliana Hilchhal Hony Secretary leh Pu Malsawmkima Chinzah, Asst.Secretary te an tel a. Bualpui Ng Zone Football Association hnenah LDFA hian Rs. 4,000 leh Football an pe bawk
MIMAL LAWMMAN
Top Scorer - Sawmthanga J.No 32, Vawmbuk FC (4 goals)
Best goalkeeper - Laltlanthanga J.No 1, Tialdawngilung FC
Best player - Rengliana J.No 6, Vawmbuk FC
Post a Comment