July 6, 2023 (Rauthla) : Vawiin khan Lai Women Association theme song 'Raltha in kan dir lai' tih Music Video chu LWA Gen. Hqrs. Lawngtlai Office, Electric Veng, Lawngtlaiah tlangzarh a ni.
LWA theme song music video tlangzarh inkhawm hi Pi V. Lalrinkimi, President, LWA Gen. Hqrs. Lawngtlaiin a kaihruai a, LWA in hla tha tak mai, Lai hnam hla an nei thei chu lawmawm a tih thu leh Laifa atam zawkin an lo thlir theih tura tlangzarh a ni tur chu lawmawm a tih thu a sawi.
Hla leh music video chungchang sawiin, Pu CZ. Thanliana, Adviser LWA Gen. Hqrs. Lawngtlai chuan he hla phuahtu chu Pi Sanghnemi, Chandmary Veng, Lawngtlai a nih thu leh a a satu chu Lalpekhlui Chinzah, Council Veng, Lawngtlai a nih thu sawiin, he hla hian chang thum neiin, minute thum chhunga rei a ni a, CZ Records, Lawngtlai Council Venga record a ni a. Music video hi LWA Gen. Hqrs. Lawngtlai produce niin, video-ah hian hla thu (lyrics) pawh dah tel a ni. Music Video hi MDM ah dah a ni dawn bawk.
Hla phuahtu Pi Sanghnemi chuan LWA in hla nei ve se tih a duh tih sawiin, hla hla hi LWA hla chauh ni lovin Lai hnam hla a ni, a ti a. Hnam dangin hla an nei nual a, keini Lai hnam pawh hian kan culture leh nihna humhim zel nan hnam hla kan neih tam a ngai a ni, a ti.
Music video hi Pu K. Zozamliana, Adviser LWA Gen. Hqrs. Lawngtlaiin a tlangzarh a, vawiin hun hmannaah hian Pu Ch. Vanlalruata, LUP Gen. Hqrs. Lawngtlaiin thu a sawi bawk a ni.
Post a Comment