July 4, 2023 (Rauthla) : Tunlai hian Lawngtlaiah Central YLA Drug Reduction Squad te hmalakna avangin damdawi no. 4 a rem tan a, hetih lai hian Alprozolam leh damdawi dang, a tui chi te a hluar thar hle.
Central YLA DRS din, September 2, 2022 atanga vawiin thlenga Zu, Ganja leh damdawia inhnamhnawih mihring man tawh zawng zawng chu mi 228 niin, damdawi no. 4 hi hawng 30 (gram 182) man tawhin, Ganja hi Kg 9 manin, Zu (Local) hi fun 830 an man tawh bawk. CYLA DRS DRS ten ruihhlo ti/zuar an man tam ber hi Lawngtlai khawpui chhung a mi niin, foreigner kut atang pawhin damdawi man an nei nual.
CYLA DRS te hian ruihhlo ti thin an man te hi an thlahthlam ngawt lova, enkawl zui ngai ang chi mi 50 chuangte chu TNT ah an dah tawh a, Lairam Rescue Center ah mi 10 dawn an dah tawh bawk a. Hei mai bakah hian Kohhranin Salvation Camping an buatsaih thinah pawh an dah lut bawk.
Hei mai bakah hian DRS hian TNT a an dah, damlo inentir ngai ang chi te pawh an inentirna tur pawisa thlengin an tumsak a, TNT a an dahnaa kal leh haw man an tum vek bakah, an zuk leh hmuam turte, pawisa deposit tur thlengin an dah sak a, an ei tur buhfai, dal, alu leh thildang pawh an pe thin bawk. Tunah hian an mamawh ang pe turin an inbuatsaih leh mek a, hetih lai hian an pawisa neihin duhthu a sam lo hle thung niin CYLA DRS hruaitute chuan an sawi.
Central YLA DRS Chairman Pu Eden Lalrammawia Chinzah chuan DRS ten ruihhlo an dona kawngah mipui, NGO dang leh Kohhran ten an thawhpui thin naah lawmthu a sawi a, thawhpui chhunzawm zel tura sawmin, kohhran hrang hrangte tawngtainaa hre chhunzawm zel turin a ngen bawk.
Post a Comment