July 4, 2023 (Rauthla) : AIFF Player of the Year-ah Mumbai City forward Lallianzuala Chhangte chu thlan a ni. AIFF General Body Meeting vawiina Bengaluru-a neih chuan AIFF Player of the Year atan hian an puang a ni.
A tlan chak em avanga Indian Football-in Mizo Flash tia a hriat lar Lunglei tlangval Lallianzuala Chhangte hian season liamta kha a hmang tha hle a. Season liamta chhung ringawtin mimal lawman pawh heng; Indian Super League Hero of the League: 2022–2023, Durand Cup Golden Boot: 2022, Indian Super League Hero of the Month : January 2023, Hero Tri-Nation Series Player of the Tournament: 2023, FPAI Indian Player of the Year: 2023 te a dawng hman vek a. Indian Super League khelh zawh takah India player goal khung tam ber niin, goal 10 a khung a, assist vawi 6 a nei bawk.
Kum 26 mi LZ Chhangte hian India chu Hero Tri-Nation Series-ah a champion pui a, hetah hian player of the tournament atan thlan a ni a, 2023 Intercontinental Cup-ah India chu champion pui lehin Sunil Chhetri nen top scorer an ni. SAFF Championship khelh mekah India chu final a luh pui bawk.
Indian football award winners for the 2022-23 season
| Player/Coach | Award |
|---|---|
| Lallianzuala Chhangte | AIFF Player of the Year (Men) |
| Manisha Kalyan | AIFF Player of the Year (Women) |
| Akash Mishra | AIFF Emerging Player of the Year (Men) |
| Shilji Shaji | AIFF Emerging Player of the Year (Women) |
| Clifford Miranda | AIFF Coach of the Year (Men) |
| Priya PV | AIFF Coach of the Year (Woen) |
Post a Comment