July 31, 2023 : Chief Minister Pu Zoramthanga chuan NGO Coordination Committee-in Aizawl a kawngzawh an huaihawt a a tel vena chhan chu kha kawngzawh kha Manipur-a remna leh muanna a awm theihna atan leh Manipur Zofate thlavang hauhna a nih vang a ni, a ti.
Pu Zoramthanga chuan Manipur state chhung inrelbawlna-a inrawlh a puhna chu thu dik lo a ni, a ti a. Manipur Chief Minister N. Biren Singh-a'n a puh anga inrawlh loh thu leh Zofate insuihkhawm a rorelna pakhat hnuai a awm theihna atana hmalak chu Biren Singh-a pian kum, 1961 atang khan MNF thiltum a lo ni daih tawh a ni, a ti a. Manipur a Meitei-hovin hmun hrang hranga a lim an hal chu an zalenna an hmang a ni ve mai-a a ngaih thu sawiin democracy ram a ni a, an thiam danin an ti ve mai, tiin a lim haltute huatna leh an chunga thinrimna a neih loh thu a sawi a ni.
Manipur a tharum thawhna chu Mizoramah a kangkai ve mek a, mi 12,000 chuan an sahimna zawngin an rawn raltlan tawh a ni a ti a, chuvangin a tan pawh ngawih mai mai theih a ni bik lo a ti. An buaina hian Mizoram chauh lo hmarchhak state hrang hrangah nghawng a neih a rin thu a sawi a. Nakum Parliament inthlanpui-ah pawh MNF thawhpui NDA hian an tawrh phah mai thei a ni a ti a. Manipur buaina chungchanga sorkar laipui chet dan chu mak a tih thu a sawi a. An sahimna zawnga in lum luah thei lo leh an in leh lo hala tihchhiatsakte tanpui tura sorkar laipui che muang lutuk chu ţha a tih loh thu a sawi bawk.
Manipur buaina chu sorkar laipui-in politics hmanga a chinfel a ngai a ni a ti a. Sorkar laipui leh Manipur state sorkar tangrualin tualchhunga indo mekte an indo titawp tura tihtak zeta tan an lak a ngai a ni a ti.
CM chuan MNF chu NDA a tel a ni chungin an thiltih zawng zawng an pawm dawn loh thu a sawi a. Uniform Civil Code (UCC) chungchangah pawh NDA thiltih chu an dodal mai a ni a ti a. NDA an zawmna chhan chu hmasawnna thilah a ni a, Mizote nunphung leh sakhaw tana ţha lo an tih dawn chuan an dodal zel dawn niin a sawi bawk a ni.
Post a Comment