July 31, 2023 : Rorel lai MNF chuan Assembly inthlanpui lo awm turah Rajya Sabha MP Pu K. Vanlalvena chu Aizawl South – I-ah an dintir dawn tih an puang.
Inrinni, July 29, 2023 a MNF Nomination Committee ţhukhawm chuan Aizawl South – I assembly biala an party candidate atan Pu K. Vanlalvena hi an ruat a. Hemi biala MLA ni lai ZPM mi Pu C. Lalsawivunga nen an inkhing dawn niin a lang. MNF party hian hemi hma hian Hachhek leh Serchhip biala ding turte an puang tawh a. Hachhek bialah hian Minister of State ni mek Pu Robert Romawia Royte chu a ding dawn tih chiang taka puan a nih bakah chanchinbumi ni ţhin Pu J. Malsawmzuala Vanchhawng chu Serchhip bialah a din tur thu puan a ni tawh bawk a ni. Hemi hnu hian Siaha biala ding turin MADC a MDC ni lai Pu H.C. Lalmalsawma Zasai, Lawngtlai West-ah LADC-a CEM ni lai Pu V. Zirsanga, West Tuipui bialah Pi Prova, Aizawl North-I bialah Minister ni lai Pu R. Lalzirliana, Aizawl East–II-ah Pi B. Lalawmpuii leh Ţawi bialah Aizawl Mayor ni mek Pu Lalrinenga Sailo te chu ding turin MNF nomination committee chuan an tifel tawh bawk a ni.
Hetih lai hian ZPM chuan Mizoram Assembly bial 40 zinga 39 chuh turin an candidate tur hming an puang tawh a. Tuichawng biala chuh tur hming an la puang lo. Congress chuan South Tuipui, Siaha leh Serchhip assembly biala ding turte an puang chiang tawh thung. BJP leh PC Party chuan an candidate tur an la puang lo. Tun assembly kal lai mekah hian MNF chuan MLA 28 an nei a, ZPM-in 6, Congress-in 5 leh BJP-in 1 an nei mek a ni.
Post a Comment