June 30, 2023 (Rauthla) : Vawiin khan ZPM Gen. Hqrs. a General Secretary i/c Legal department Vanlalsiama Pachuau chuan Lawngtlaia chanchin thar lakhawmtute kawmin, LADC chairman-in Lawngtlai East biala ZPM candidate Dr. Lorrain Lalpekliana Chinzah show cause notice a pek chungchangah Dr. Lorrain Lalpekliana Chinzah chuan LADC (CCB Rules) zah tak chungin leh CCB Rules phal ang thlapin ZPM a support a, hetia MDC atanga paihchhuah tumna awm hi Constitution of India kalh tlat a ni, a ti.
ZPM GS chuan Dr. Lorrain Lalpekliana Chinzah-in show cause notice a hmuh chhan chu ZPM party-in 38 A/C Lawngtlai East-a MLA candidate ni tura a puan vang a ni tih tarlan a ni, a ti a. India Constitution, Para 2, Sub Para 6-A chuan MDC term chu Para 16-na hmanga Council thiah a nih ngawt loh chuan MDC atana lakluh a nih atanga chhiarin kum 5 chhung atan thlan an ni tih chiang taka tarlan a nih thu sawiin, Constitution of India-in Autonomous District Council te chu MDC member te ban an nih na tur leh MDC term pawh tawi theihna thuneihna a pe lo tih sawiin, 6th Schedule, Para 3 a tarlan bakah dan siam turin thuneihna a nei lo tih a sawi a, District Council siamtu chu 6th schedule a ni a, 6th schedule kalh zawng emaw dodal zawnga dan siam thu District Council tan thil theih a nih loh thu a sawi.
India Constitution, 6th schedule, Para 21 ah chuan 6th schedule hnuaia dan reng reng dah belh emaw, tihdanglam emaw paih emaw tur chuan parliament chiahin thuneihna a nei, tih tarlangin, 6th schedule-a MDC te term tur a tarlan piah lama MDC disqualify theihna dan ADC in a siam a nih chuan India Constitution kalh tlat a ni a, dan lo a thiltihna a ni bawk, a ti.
LADC a MNF sorkarin MDC atanga Dr. Lorrain Lalpekliana Chinzah paih chhuah an tumna point te hi Constitution of India kalh tlat a ni a, CCB Rules zah tak chunga ZPM a support-na a tih lan avang leh Lawngtlai East biala ZPM candidate atana puan a nih tak avanga MDC atanga paih tumna awm hi MNF sorkar hnuaiah hian dan ang ni lo pawha rorelna kalpui an hreh loh zia a tichiang hle ah kan ngai, a ti.
Dr. Lorrain Lalpekliana Chinzah chuan LADC chairman-in show cause notice a pek chu a chhan tawh thu leh hetianga MDC te show cause notice inpek hi LADC chanchinah a la thlen ngai loh thu a sawi a. LADC chairman Pu VL. Hmuaka chu mi rilru tha a ni a, ama remruatnaa show cause notice chu pek a nih a rin loh thu sawiin, chung lam nawrna vang a ni, a ti.
Zawhna chhangin Dr. Lorrain Lalpekliana Chinzah chuan ZPM party-in candidate tur a puang ringawt a, hei hi official a la ni lova, ZPM a membership fee ka pek loh chhan hi candidate turin membership fee a pe ngei ngei tur a nih tih ZPM danbuah a inziak lo, a ti.
Alinery Lalngilneii Lianhlawng nen an inkarah boruak tha lo siam tum an awm tih sawiin, Alinery Lalngilneii Lianhlawng nen hian ZPM thatna tura pen chhuak ve ve kan ni a, mi fel leh mithiam a ni a, ka titi dun nasa hle bawk, a ti a. Tupawhin ticket hmu ila, inpuih tawn turin thu kan titlua, hei hi a ngheh reng pawh ka beisei, a ti a. MDC ni chunga MLA din hi ka tum bik lova, lo tum pawh ni ila a sualna ka hre lo. MDC ni chunga MLA ding hi kan hre nual tawh, a ti bawk.
Post a Comment