May 2, 2023 (Rauthla) : Congress President Pu Lalsawta chuan Tang Puihna hmangin eizawnna kawng hrang hrangah a mamawh te tan tanpuina cheng nuai hnih an pe dawn tih vawiina an Manifesto No.1 ‘Tang Puihna’ zirhona an neihnaah a sawi.
Golden Hall, Congress Bhawan-a an Manifesto No.1 ‘Tang Puihna’ zirhona hun hi MPCC Vice President leh MPCC Manifesto Drafting Committee Chairman ni bawk Pu Lal Thanzara’n a kaihruai a. Pu Lalsawta chuan Congress Party Manifesto No. 1 “Tang Puihna” chungchang sawifiahin eizawnna kawng hrang hrangah a mamawh te tan tanpuina Rs.2,00,000/- (nuai hnih) kan pe dawn a ni, a ti a. Chhungkaw mala tanpuina pek bakah kut hnathawktute leh kawng hrang hrang hlawhtlin tuma beitute hnenah sorkarin an mamawh intawm tur thil a tih sak dawn a, heng mamawh intawm tur thil: kawng siamna, tui lakna, khawl leina leh society ten an mamawh ang chi ah phei chuan cheng vaibelchhe tel thlengin Sorkarin an mamawhna zawnah tanpuina a pe dawn a ni. Sem policy nena a danglamna chu a mamawh leh hlawhtling ngei tura thawktute hnenah chauh 'Tang puihna' hi pek tur a ni, a ti bawk.
Pu Lalsawta chuan, kan budget kalphung hi Planning Commission hunlai nen a danglam tawh avangin, sum kan enkawl thiam phawt chuan Congress Party Sorkar lai pawh khan a tulna apianga hman theih turin kum khatah NEDP hnuaiah cheng vaibelchhe 1,000 (cheng nuai hlir nuai khat) zet kan dah thei a ni. NITI Ayog hnuaiah chuan kan chanvo, kan State Budget hi ruahmanna fel tak nei a kan enkawl phawt chuan Mizoram mipuite chhanchhuahna tura ruahmanna kan siamte hi harsatna awm lo in kan ti hlawhtling thei tih hrechiangtu ka ni a ti bawk a ni. Sorkar kal tawhah thlarau MR thahnem tak kan umbo tawh a, thlarau MR umbo avangin kum khatah sorkarin cheng nuai 4,900 zet kan humhim thei a ni, a ti bawk.
Post a Comment