Lawngtlai, May 2, 2023 : Vawiin khan Sports & Youth Service Department, LADC buatsaihin LADC Conference Hall-ah kum 2022-2023 inkara infiammite State leh National Level china che tha te hnenah Incentive Cash Award pekna hun hman a ni a. Pu C. Hrangthianga, Executive Member i/c Sports etc LADC chu khuallian a ni.
Khuallian chuan, kan Budget te a beitham ve deuh avangin duhthusam ang pawhin hma kan la thei lova. Nimahsela, he sorkar hian infiamna kawngah hma kan sawn theihna turin hma a la chho mek zel ani. Sports disciple hrang hrang te’n hma an sawn zel theihna turin he sorkar hian ngaihtuahna a senpui zel dawn ani, a ti.
Pu C. Hrangthianga chuan he sorkar hian kan infiammite hma kan sawn zel theihna turin budget a dah zel a. Infiammite pawhin an mahni tana hamthatna an haichhuah theihna tura ruahmanna a siam te hi haichhuak a, ti tak taka hma la zel turin a chah a. Mahni talent hi hria a, kan ngaihpawimawh a, tih tak taka kan tih pawh a ngai ani. Infiamna hi eizawnna tling ani tih hria ila, chumi a hlawhtlinna chang ngei tur chuan tih tak zet a hma kan lak a ngai ani, a ti bawk. Tin, infiamna kawnga kan hlawhtlin theihna tur chuan chhungkua pawh kan pawimawh hle a. Kan fate infiamna kawnga an hlawhtlin theihna tur chuan kan tui pui a, an tan kan insenso ngam ve te pawh a ngai ani, a ti bawk.
Infiamna kawnga hma kan sawn theihna turin zirtirtu tha kan mamawh hle a. Chutiang tur chuan sorkar pawh hian ngaihtuah a seng nasa hle a. Hei hi Association hrang hrangte pawhin hria a, zirtirtu tha kan neih theihna tura hma kan lak ho a ngai a. Tunah hian Sports & Youth Service Department hnuaiah hian Football leh Boxing hian coach kan nei tih loh chu Discipline dangin an nei loh avangin hemi kawngah hian tan kan lak ho pawh a ngai ani, a ti bawk.
Pu C. Hrangthianga chuan, infiammite kan ram leh hnam tana infiamna kawnga hlawhtlinna changtute hi kan hre reng che u a, hei hi sorkar pawhin a ngaipawimawh hle a. Sorkar in a tih theih tam lo mahse, theihtawp a chhuah zel dawn ani, a ti bawk.
Kumin hian Infiammi 59 hnenah Incentive Cash Award hi pek an ni a. Discipline paruk Football, Boxing, Badminton, Chess, Volleyball leh Racing a infiammite hnenah pek an ni a. Gold medal la te hnenah Rs. 3,000, Silver Medal ah Rs. 2,000 leh Bronze medal bikah Rs. 1,500 hlan an ni a. Tin, kum 2022 a Inter Sixth Schedule Premier Leaque player te hnenah Rs 5,000 theuh hlan an ni.
Post a Comment