May 12, 2023 (Rauthla) : MZP General Headquarters chuan MZP Headquarters Manipur kaltlangin buhfai bag 70 chu Churachandpur-ah a thawn a. Heng buhfaite hi MZP Headquarters Manipur chuan tlawmngai pawl hrang hrang Joint Philanthropy Organisation (JPO) te kutah a hlan a. An niin an member harsa zualte hnenah an sem ve leh a ni.
MZP General Headquarters chuan vehbur khawnin, damdawi leh thil hrang hrang a lakhawm mek zel a. Hun remchang hmasa berah hengte hi thawn leh tura ruahman a ni bawk.
MZP chuan buhfai an thawnna kawnga a tul apiang buaipui a, hmalakpuitu Pu K. Lalrinliana Supply Minister leh Pu TJ Lalnuntluanga Law Minister te chungah lawmthu an sawi a ni.
JPO hnena buhfai hlan dan chu hetiang hi a ni– Kuki Khanglai Lawmpi (KKL) 10 bag, Hmar Youth Association (HYA) 10 bag, Young Paite Association (YPA) 10 bag, Simte Youth Organisation (SYO) 5 bag, Zou Youth Organisation (ZYO) 5 bag, Young Vaiphei Association (YVA) 10 bag, Young Mizo Association (YMA) 10 bag.
Heng bakah hian mi harsa leh a mamawh zualte hnenah MZP Headquarters Manipur chuan Kg. 10 den denin a sem kual bawk.
Post a Comment