May 12, 2023 (Rauthla) : Norway leh Manchester City striker Erling Haaland chu Football Writers' Association Men's Footballer of the Year atan thlan a ni. Hmeichhe lamah Australia leh Chelsea striker Sam Kerr chu Football Writers' Association Women's Footballer of the Year atan thlan a ni bawk. He lawmman hi tun thla ni 25 ah London-a Landmark Hotel-ah hlan an ni ang.
Kum 22 mi Erling Haaland hian tun season-ah Manchester City tan inelna hrang hrangah match 47 khelin goal 51 a khung tawh a. Premier League Top scorer ni mekin, goal 35 a khung tawhin, assist vawi 7 a nei mek a. Hat-trick vawi 4 a siam tawh bawk
England-a football writer 400 rual ten Football Writers' Association kaltlanga season kalmeka English Football inelna hrang hranga che tha an thlanah hian Arsenal winger Bukayo Saka chuan pahnihna hauhin, Gunners-a teammate Martin Odegaard chuan pathumna a hauh bawk. Manchester City playmaker Kevin De Bruyne chu palina niin, Manchester United striker Marcus Rashford chu pangana a ni bawk. Mipa lam he award dawng zing ber chu Arsenal striker thin Thierry Henry (3) a ni.
Erling Haaland chuan "English football-a ka season khatnaa he lawmman dawng tura thlan ka ni hi chawimawina ropui tak a ni. Nitinin a tha ber nih tumin ka bei a, ka teammate te hi an ropui em em a, goal ka khung theih nan chance min siamsak thin" a ti a "An zavaia chungah lawmthu ka sawi a, an ni tel lo hian he lawmman hi ka dawng thei lo" a ti bawk.
Manchester City manager Pep Guardiola chuan Erling Haaland chu Cristiano Ronaldo nen tehkhinin, "A goal khung dan leh Cristiano Ronaldo goal khung dan hian inanna tam tak an nei a, Messi erawh complete player a ni. Messi chu khawi hmunah pawh a khel thei a, Cristiano leh Erling te erawh khawl (machine) an ni" a ti.
Post a Comment