May 11, 2023 (Rauthla) : Mizoram Board of School Education (MBSE) chuan vawiin chhun dar 12 khan High School Leaving Certificate Examination (HSLC) 2023 result a ti chhuak a, zirlai exam 18,102 zinga 12,878 an pass a, pass percentage 71.14% niin, nikum (70.64%) aiin a sang. HSLC 2023 ah hian pakhatna Cynthia Lalhlupuii Shangpliang, D/o Kyrshanbor Shangpliang, St. Paul's HSS chu pakhatna a ni a, top 10 ah mi 17 an lang.
HSLC 2023 ah hian top 10 a lang mi 17 zinga mi 14 te chu hmeichhia niin, mipa 3 an lang. Kumin HSLC ah hian candidate 18,102 awmin, pass percentage 71.14 niin, nikum pass percentage 70.64 aiin a sang hret.
Lawngtlai District chhungah Don Bosco High School Lawngtlaia zirlai exam zawng zawng zirlai 74 leh Hermon Comprehensive High School (Sub-Center), Nghalimluia zirlai 21 te chu an pass vek a. JR. Residential Public High School, Chawngte 'P' a zirlai 4, Siachangkawn RMSA Secondary School a zirlai 7, Rulkual RMSA Secondary School-a zirlai 2 leh Govt. Lai High School, Vawmbuka zirlai 18 te chu an fail vek thung.
Lawngtlai District atangin zirlai 1900 (regular) in exam an hmachhawn a, zirlai 943 an pass a, distinction-ah zirlai 35, first division-ah zirlai 173, second division-ah zirlai 315 leh third division-ah zirlai 420 te an pass. Paas percentage chu 49.63% a ni. Zirlai 83 ten private in exam an hmachhawn a, zirlai 13 (II Div. - 2, III Div. - 11) an pass bawk a. Pass percentage chu 15.66% a ni.
Lawngtlai District chhunga High School zingah Don Bosco High School chuan distinction-a pass nei tam berin zirlai 10 distinction-ah an pass a, Ngurnunsangi High School zirlai 8 te distinction-ah an pass bawk. Don Bosco High School leh Ngurnunsangi High School te hian letter hmu zirlai 28 ve ve an nei bawk.
Post a Comment