May 11, 2023 (Rauthla) : Governor Dr. Hari Babu Kambhampati leh a nupui Lady Governor Dr. Jayashree Kambhampati te chuan vawiin khan Hnahthial District an tlawh.
Governor hian Tuipui D khua a tlawh hmasain, Governor hian Tuipui D ah hian Project Pushpak ten hun rei vak loa an thawh tan tur, Lei (bridge) dawh hna chungchangah Pu SP Kolipey, Chief Engineer, BRO, Project Pushpak Mizoram leh a thawhpui te thil a zawt fiah a. Chief Engineer, BRO chuan Lei dawh tur chungchangah thil tul hmasa te tihfel a ni tawh a, hna thawh tan theih thuai an in beisei tih a sawi. Tuipui D a Chhimtuipui Lui kanna tur hian tunah Bailey Bridge a awm mek a; tonne 4 aia rit a dawl zawh loh avangin Lirthei te nau (LMV chin) chiah kal phal a ni a. Lirthei lian deu hret MMV ang chu Mar Boat in a phur kai thin a ni.
Chawhnuah Pu R.Lalremsanga, Deputy Commissioner, Hnahthial District chuan PWD Inspection Bungalow, Hnahthialah Governor leh a nupui pualin inlawmna hun a buatsaih a. He hunah hian Head of Department te nena inhmelhriatna hun leh cultural program tawi a buatsaih a ni.
Governor hian KVK Lunglei Complex, Hnahthial tlawhin, KVK Office kawtah Horticulture, Agriculture, Sericulture, and AH&Vety along with KVK leh MzSRLM ten dawrte an hawn te a endik hmasa a. Hemi hnu hian Conference Hall, KVK Lunglei, Hnahthialah Governor puala official program chu hman a ni. He hunah hian Governor Dr Hari Babu Kambhampati chuan District Office a hotulu te, Bank hnathawk te, MUDRA loan bank a latute, Kohhran hruaitute, Political Party hruaitute leh Tlawmngai pawl te a kawm a ni.
Post a Comment