May 11, 2023 (Rauthla) : May 9, 2023 a CADC MDC Inthlanpui 2023-a vote tlate chu vawiin May ni 11, 2023 (Ningani) khan Chawngte SDO (Civil) Office Complex-a Counting Hall pahnihah chhiar a ni a, zing dar 8:00 atangin chhiar tan a ni.
11th CADC inthlanah hian seat 20 awmin seat 19 ah inthlanna buatsaih a ni a. MNF in seat 10, lain, BJP in seat 5 an la a, INC in seat 4 lain, ZPM in seat an la lo. Party mala sorkarna siam thei an awm lova. May 17, 2023 hian Rengkashya bialah inthlanna neih a ni ang a. Hemi bial dinhmun a zirin sorkarna siam thei tur chu a chiang dawn a ni.
CADC inthlanna neih zawh takah khan Constituency 19-a polling station 67-ah vote thlak nana hman Electoral Voting Machine (EVM)-ah vote awm thei zawng zawng 34,474 (mipa 17,455 leh hmeichhia 17,019) atangin vote 32,321 (mipa 16,462 leh hmeichhia 15,859) a tla a, chu chu 93.75% a ni.
Inthlan nia election duty avanga mahni vote neihna hmuna vote thlak thei lo turte hnen atangin postal ballot hmanga vote thlak dilna 108 dawn niin, postal ballot vote tla 103 a awm a. EVM vote tla leh postal ballot vote tla zat belh khawm chu 32,424 a ni a, chu chu vote awm thei zat (34,474) atangin 94.05% a ni.
15-Rengkashya MDC Constituency huam chhunga polling station 3-ah chuan May ni 17 khian vote thlak a ni ang.
Post a Comment