Lawngtlai, May 29, 2023 : Lai Student's Association General Headquarters ,Lawngtlai chuan MBSE-in kum-2023 a HSLC leh HSSLC results a tih chhuah taka Laifa zirlai ti thate lawmpuina hun vawiin khan buatsaihin, chawimawina thuziak an hlan. He hun hi Pu L. Daniala, Executive Member, Education (P/S) changtu chuan khuallian niin a hmanpui.
Eric Lalliankima, Treasurer kaihhruai CYLA Hall, Lawngtlai-III a zirlai titha chawimawina hunah hian khuallian Pu L. Daniala chuan Laifa zirlai thahnem tak chawimawina hlan tur an awm chu lawmawm a tih thu sawiin, ram leh hnam ti hmingtha tura theihtawp chhuah chhunzawm zel turin a sawm a. Ram leh hnam nghahfak chu zirlaite an ni tih hria a, ram leh hnam tana chhenfakawm tak ni thei ngei tura thiamna sang zawk nei ngei tura zir chhunchawm zel turin a sawm a. HSLC leh HSSLC-a hlawhtlinna chang zo ta lo te pawh hnual mai lo tur leh hlawhchhamna chu hlawhtlinna neih tirtu atana hmang thiam turin a chah bawk a ni.
Pu F. Vanlalruatpuia, President LSA Gen. Hqrs. chuan zirlai chawimawite chu an bul tannaah chauh ngai a, kalkawng thui zawk an zawhna turah theihtawp chhuah zel turin a beisei thu a sawi a. An zirna kawngah harsatna leh mamawh an neihte chinfel pui leh tanpui turin LSA chu a in hawn reng thu a sawi bawk a ni.
Vawiina zirlai ti tha chawimawina hlan te hi HSLC leh HSSLC-a Distinction a passed chinte niin, HSSLC-a Distinction a passed zirlai 24 leh HSLC-a Zirlai 38, an vaiin zirlai 62 te hnenah chawimawina thuziak hlan an ni. Zirlai ti tha chawimawina hlan zingah hian HSSLC-a Top ten a lang zirlai pathum- Hmingthanzami, D/o T. Zakunga, Lawngtlai College Veng, Science stream ah Pali(4) na ; H. Vanlalrini, D/o H. Lalnghakzuala, Lawngtlai Council Veng, Commerce Stream ah Parukna (6) leh Ruthi C. Lalengzuali, D/o C. Vanlianhmunga, Lawngtlai Council Veng Arts stream ah Pasarihna (7) te an tel bawk a ni.
Post a Comment