May 26, 2023 (Rauthla) : Lai Autonomous District Council-a CEM Pu V. Zirsanga'n vawiin khan Bungtlang South II a Middle School din thar South Gate Middle School a hawng.
Pu V. Zirsanga chuan, Bungtlang South chu Lawngtlai District khawthlang lam (Western belt) a khaw lian ber zinga mi ni mahse, sawrkar Middle School pakhat chauh a awm tih sawiin, naupang leh zirlai ten admission chungchangah pawh harsatna an tawk thin tih a sawi a. LADC a MNF sawrkar leh Bungtlang South Bialtu MDC Pu. L. Lalhmachhuana thahnemngaihna leh, Education & Human Resources Department, LADC a Officers te leh thawktute thawhrimna a zarah sawrkar Middle School thar, South Gate Middle School hawn a lo ni ta chu lawmawm a tih thu sawiin, Zirtirtu leh thawktute zarah School tha leh entawn tlak a nih ngei theih nan duhsakna a hlan che u a ni, a ti.
Pu V. Zirsanga CEM chuan South Gate Middle School a thawktu te chu an eizawnna leh an rawngbawlna, zirtir hna chu zahawm tak leh taima taka thawk a, thiamna leh hriatna ringawt pe lo va, naupangte chu nundan mawi zirtir a, mi puitling a chherchuak ngei turin turin a chah a. Chutiang tur chuan sawrkar, nu leh pa leh mipuiin beiseina nen kan lo thlir reng dawn che u a ni, a ti bawk.
CEM chuan financial year tharah pawh LADC a MNF sawrkar chuan Middle School 2 leh Primary School 1 din turin ruahmanna a kalpui mek tih sawiin, CEM a nih chhungin Middle School 4 leh Primary school 1 din a nih tawh thu a sawi.
South Gate Middle School, Bungtlang South-II hi September ni 9, 2022 khan din phalsak niin, Bungtlang South-II VC te kaihhruainain sikul insak hna hi khawtlangin an thawk a. Tunah hian Zirtirtu 3, IV Grade 1 leh zirlai 20 an awm mek.
Pu V. Zirsanga CEM hi Pu C. Rongura EM, Pu Andrew Laltlanzara EM, Pu JB.Vanhoy EM, Pu L. Daniala EM, Pu N. Zangura Adviser to CEM, Pu LN. Lalhmachhuana MDC leh Official tha hnem takin an tawiawm a ni.
Post a Comment