May 13, 2023 (Rauthla) : Tukin zing khan Karnataka State Assembly 2023 inthlan result chhiarna neih a ni a, Congress in seat 137 lain, BJP seat in 65 an la a, JDS in seat 19 lain, party tenau dangin seat 3 an la ve bawk. Inthlan hi May 10, 2023 khan neih a ni.
Karnataka state Assembly-ah hian seat 224 awmin, sorkarna siam tur chuan party malin seat 113 an lak a ngai a, Congress chuan sorkarna siam tura seat mamawh zat an lak avangin Karnataka-ah hian sorkarna an siam dawn ta a ni. Vawiin vek khan Chief Minister nilai Basavaraj Bommai chuan Governor hnenah CM atanga a banna a thehlut nghal.
Inthlan hmasa 2018 ah khan Congress in seat 80 an la a, BJP in seat 104 lain, JDS in seat 37 an la a, party tenau thenkhatin seat 3 an la bawk. Congress leh JDS ten sorkar intawm siamin, JDS leader H. D. Kumaraswamy chu Chief Minister a ni a. July 2019 ah Congress leh JD (S) member thahnem takin banna an thehlut a, BJP in sorkarna siamin B. S. Yediyurappa chu Chief Minister a ni. July 26 2021 khan Yediyurappa chu Chief Minister a nihna atangin a bang a, Basavaraj Bommai chu July 28 2021 ah Chief Minister atan lakluh a ni.
Sorkar lai BJP an tlahniam hle a tih theih a, inthlan hmasaa seat 104 la thei khan kumin inthlanah chuan seat 65 chauh an la thei a, seat 39 an hloh. Hei hi a chhan ni a lang chu Karnataka Political expert te sawi danin, Karnataka-ah hian mipuite thinlungah sorkar lai thlak duhna boruak a lian hle. Hei mai bakah hian BJP hruaitu lawk thenkhat ten inthlan dawn hnaiah BJP an chhuahsan hlawm bawk a. February khan BJP leader H.D. Thammaiah leh a thuihhruaite chuan Congress an zawm a, March khan BJP leader Puttanna chuan Congress zawmin, thla hmasa khan Karnataka Chief Minister hlui Jagadish Shettar BJKP chhuahsanin Congress a zawm a. BJP leader Laxman Savadi, S Angara, M P Kumaraswamy leh R. Shanka ten BJP an chhuahsan bawk. Heng BJP leader ten BJP an chhhuahsan avang leh Congress an zawm avang hian BJP dinhmun a tlahniam a, Congress a invawrh niin an ngai.
Karnataka-ah Congress-in hnehna an chak takah chuan Chief Minister tur inrinsiakna a lian chho nghal hle a. chief minister hlui, Varuna bial atanga thlan tlin Siddaramaiah leh Karnataka Congress President, Kanakapura bial atanga thlan tlin DK Shivakumar te chu Chief Minister ni tura rinkai an ni.
Post a Comment