Lawngtlai, May 12, 2023 : Hnam Martar Capt. Chhunhranga Lawtlai ruhro chu vawiin khan amah an phumna 71 RCC Gate chhungah phawrh niin, vawiin vek khan ama pualin Hnam Run, Lawngtlaiah hun hman a ni. Capt. Chhunhranga Lawtlai ruhro hi Martarte Thlanmual, Aizawlah phum a ni ang.

Aizawl atanga lo kal ex-MNA Secretary Pu Thangrum chuan Ram leh hnam tana martarte hi MNF tan a ni lova, Mizo Hnam tan, ram leh hnam khata awma zalénna suala Martarte an ni, a ti a. Capt. Chhunhranga Lawtlai kan ram leh hnamin kan nei hi kan chhuang em em a ni, a ti bawk.

Pu Thangruma chuan Pathian leh kan ram tana Martarte hi keini MNF te chauh hian kan ngai hlu a, Martar Day hial kan hmang thin a. Party dang unaute erawh chuan an uar vak lemlo a ti a. Kan Martarte hi an zahawma an thlan hmun sawrkar in a buatsaih a, an thiante bula mu ve tawh turin - kan dah thin a ni. Kan thiante ruhro hi chu  khawi hmunah pawh awmse kan la zel dawn a ni, a ti bawk.

MNF Dist. Hqrs., Lawngtlai President President Pu Lalzahawma Chinzah chuan, keini MNF party te hian hnam Martarte hi kan zahin kan ngaisang a, state ralmuang ber kan nih theihna tura zalênna min siamsaktute hi kan hnam martarte vang niin, an thisen leh thlan tui hmanga lei chhuah anihna lai te hi MNF danglam bikna a ni, a ti.

Capt. Chhunhranga Lawtlai hi kum 1942 July thlaah a piang a, Zirna lamah Class VI niin, 1962-1963 velah MNF Underground ah kalin, 1967 ah nupui neiin leh 1968 ah fapa a nei bawk. Kum 25 mi niin a boral a ni. January 31, 1968 khan Arakan atangin a haw chho a, Vahai khawdai ramhnuaiah vai sipaite nen intawng fuhin an kaphlum.


Post a Comment

Powered by Blogger.