India khua leh tui tan India ram chhunga khawi hmunah pawh ration a lak theih

May 25, 2023 (Rauthla) : Vawiina Mizoram sorkar thuchhuahin a tarlan danin, Ministry of Consumer Affairs, Food & Public Distribution, Department of Food & Public Distribution, Government of India thuchhuak angin One Nation One Ration Card (ONORC) programme hnuaiah migrant NFSA beneficiaries (AAY & PHH) te'n India ram khawi hmunah pawh an ration buhfai an la thei tawh a. Hemi atan hian FPS Dealears (Retailer) te'n buhfai an mamawh belh anih chuan an ePoS device hmangin an mamawh belh zat an thlen tur a ni.

ONORC hnuaia ration lak (transaction) hi Central Sawrkar chuan a tam thei ang ber nei turin State tin te a nawr nasa hle bawk a ni. Hetiang a lo nih tak avang hian tuna kan ram thenawma kan unau Mizorama rawn raltlan te pawh an ration quota pangngai chan lovin an bul hnai Fair Price Shop (Retailer) ah an la thei a. Hei hi FPS Dealers (Retailer) te'n an lo hnar tur a ni lova, an Ration Card an lo dil kher tur a ni lo bawk. Beneficiary te'n an Ration Card number emaw Aadhaar number an hriat chuan a tawk mai a ni.

Mizoram sorkar chuan India sawrkar in One Nation One Ration Card (ONORC) programme a ngai pawimawh hle tih sawiin, he program hi State tin te chu kalpui turin thu a pe tawh a ni, an ti a. Hemi chungchangah hian Food, Civil Supplies & Consumer Affairs Department chuan Mizoram chhunga Buhfaisem (Retailer) te chu Office thupek chhuahin a hriattir tawh thu an sawi bawk.