May 2, 2023 (Rauthla) : Vawiin khan Health & Family Welfare Minister Dr R. Lalthangliana kaihruaina hnuaiah SAD Conference Hall, MINECO ah Mizoram a COVID-19 hripui dinhmun thlirho a ni a. Health & Family Welfare Board Vice-Chairman Dr ZR Thiamsanga, MLA, H&FW Principal Secretary Pi Esther Lalruatkimi bakah Health & Family Welfare Department official pawimawh dangte leh ZMC hotute an tel a ni.
Dr R. Lalthangliana chuan hun engemaw chen COVID-19 hri kai thar kan neih tawh loh hnuah April thla atang khan hrikai an awm thar leh thu a sawi a, tun dinhmunah phei chuan hmarchhak state 8 zinga positive case nei tam ber kan nih thu a sawi bawk. "Hengte hi awareness kan neih that zara kan in test that vang te pawh niin a hriat a, mipuite leh official-te tan pawh chi-aina tur thil a la awm rih lo niin a lang" a ti a. Hmai tuamna (mask) vuah uluk kha kan ngaih pawimawh thar leh chu a pawimawh dawn a ni, a ti bawk.
Thutkhawma tarlan a nih danin, October ni 29, 2022 hnuah nimin khan COVID-19 hri kai mi pakhatin nunna a chan a, vanduaithlak taka nunna chan ta hi damlo natna khirh tak tuar sa a ni tih tarlan a ni bawk. Tunhnaia Mizorama COVID-19 positive hmuhchhuah tharte hi symptom nei deuh vek an ni a, travel history nei awm lovin, tualchhunga hri kai nia hriat vek an ni thung. Hri kai hmuhchhuah thar zingah naupang kum 15 hnuai lam leh kum upa lam an tam hle bawk a ni.
Thutkhawmah hian damlote enkawl dan tur leh a hmachhawn dan tur, lo inruahman dan tur siam tha tih niin a buaipuitu turte an inruat nghal a, damdawi leh hripui dona hmanraw hrang hrang kan neih mek dinhmun zirchiana a tul anga ruahmanna siam nghal tha tih nih bawkin, puipunna hmunah mask vuah tha tura mipuite inzirtir leh a tul tih sawi a ni bawk.
COVID-19 vaccine hi sawrkar laipuiin a thlawnin min pe tawh dawn lo tih tarlan niin, Mizoram sawrkarin kan mamawh angte a lei ve zel a ngai tawh dawn a, COVISHIELD hi siam chhuah a ni tawh lova, COVAXIN leh COVOVAX vaccine hman a ni tawh thung a, RT-PCR test kit leh Covid-19 hri kai serious-te enkawlna tur damdawi man to chite a tul anga lei turin NHM in ruahmanna an siam fel tih tarlan a ni bawk.
IDSP, H&FW report danin kumin April thla khan COVID-19 positive 82 (Aizawl – 75, Kolasib – 3, Serchhip – 2, Khawzawl – 2) hmuhchhuah an ni a, nimin May ni 1 khan COVID-19 positive 34 (Aizawl – 18, Kolasib – 9, Serchhip – 7) hmuhchhuah an ni.
Post a Comment