May 2, 2023 (Rauthla) : Social Welfare & Tribal Affairs Department Minister Er. Lalrinawma  chuan vawiin khan Jordan Centre, Sețhawn thlawhin thawktute leh enkawl mekte kawmna hun a hmang a. Hemi hnu hian 'After Care Home', Thingdawl a tlawh bawk. 

Minister Er. Lalrinawma chuan ruihtheih thil chu ram leh hnam hmelma hlauhawm tak a nih angin ruihhlo lak a fihlim tur a inenkawlna hmun, Jordan Centre kan neih chu țangkai tak a hman a țul thu a sawi a. Jordan Centre-an awm chhungin insiamțhat tumna rilru nei chung a hun awl hmang țhat zir turin a chah a, chhungkua leh khawtlang tan a mi țangkai ni tura intuaithar turin a fuih bawk a ni.

Minister hian Jordan Centre a tlawh zawh hian 'After Care Home', Thingdawl tlawhin hmalakna kalpui dan tur te a enpui a. Ministry of Tribal Affairs kaltlang a sak, Eklavya Model Residential School, Bilkhawthlir sak mek chu a hmun ah a endik nghal bawk a ni.

Jordan Centre, Sețhawnah hian September ni 7, 2022 ațang khan ruihhlo avanga harsatna tawk te enkawlna kalpui țan niin vawiin thleng hian mi 402 enkawl an ni tawh a. Thla 2 chhung enkawlna kalpui țhin niin thawktu, Honorary Workers 41 leh thawktu nghet 15 an awm mek a ni.

Post a Comment

Powered by Blogger.