Lawngtlai, April 6, 2023 : Bazar Veng, Lawngtlai atanga Siaha inkar kawng siamtu VINCO Construction Limited te kawng siama an duh thu a sam loh avanga an hna chawlh san tura an tih hnuah YLA Council Veng Branch te chuan an dinna ngaiah an la din reng thu an sawi.
YLA Council Veng Branch, Lawngtlai te chuan Bazar Veng atanga Siaha inkar kawng siamtu VINCO Construction Limited te chu an hnathawh a chhiat avangin leh khawtlang duh anga hna an kalpui loh avangin April 3, 2023 atangin an hna kal lai mek leh hnathawh zawng zawng chhunzawm lo turin an hriattir a. Sr. Executive Engineer, PWD, Lawngtlai hnenah pawh stay order pe ve nghal turin a ngen.
YLA Council Veng Branch hruaitute chuan stay order an pek ni atangin VINCO te hian an hna an chawlhsan tih an sawi a, tun thlengin harsatna siam zawngin an che lo tih an sawi a. Hetih lai hian sorkar atangin inbiakna pawh a awm lova, tun thlengin siamtha tura an duhna laite siamtha tura inbiakna pawh VINCO atangin a la awm lo, an ti.
YLA Council Veng Branch chuan he Project hi Rs 28,00,00,000/- (nuai Sanghnih leh Zariat) estimated amount a nih thu an sawi a, hna tan anih phat atangin engkimah DPR leh Drawing a pha lo fai nghal vek a. Side drain hi a chhuat zau zawng Feet 1, a thuk zawng feet 2 leh a zau zawng feet 2 ½ ni tur a nih laiin Drain hlui te ringin a thara hna thawh chhun pawh feet 1 em pawh tling lo a ni ta vek a ni, an ti a. FCI to Bazar inkar kawngpui chu new construction tur niin, kawng hlui zawng zawng nawr khawkin kawng chhuat down vek a, road surface dik leh mawi mam, tuihawk pawh drain a lut zung zung thei tura siam tur anih laiin chhuanlam ho te te hmangin leh pawisa seng tlem theih dan tur ang berin Vibrator chhuanlamin kawng hlui siam hnan tawp a ni a, hei hi DPR leh dan kalh a ni, an ti a. Bazar Veng atanga Siaha inkar kawng sial mek chu kum 2018 atanga theihtawp chhuaha an lo sual chhuah a ni tih an sawi a, hna tan dawn pawhin DPR anga thawk turin vawi duai lo an inhrilh niin an sawi bawk.
YLA Council Veng Branch President Pu Johnny Zothansanga chuan, inbiakna mumal tak leh an duhlaite siamtha tura inremna a awm loh chuan hei aia khauh zawka hmalakte pawh a ngai ang, a ti.
Post a Comment