April 5, 2023 (Rauthla) : Vawiin khan Kolasib Sports Stadium-ah MFA Inter-District Junior (U-17) Boys Championship 2023 final khelh a ni a, Lawngtlai DFA chuan Saitual DFA chu 2-1 a hnehin, Lawngtlaiah no mawi an rawn hawn dawn ta.
Vawiina Saitual DFA nena an inkhelhah hian Lawngtlai DFA hi a tirah bet deuh zawk angin lang mahse Saitual DFA goal nawr an dang thei zel a, a pet goal hmasatu zawkah an tang. Minute 34 ah Rothangpuia, J. no - 11 in Saitual DFA goalkeeper tihsual nangchinin Lawngtlai DFA hmahruaina goal a khung. Chawlhlawk hman atanga reilote minute 47-naah VL. Malsawmdawngkima, J. no - 23 in Saitual DFA tan corner kick atanga ball kal chu a tauh lut veleh a. Inhnehtawk taka game a kal laiin minute 71-naah V. Lalfamkima, J. no - 7 chuan Lawngtlai DFA chakna goal chu freekick atangin mawi lutukin a khung.
Lawngtlai DFA hian Group Match-ah Khawzawl DFA 1-3 a hneh lovin, Serchhip DFA chu 7-0 a hnehin, goal difference hmangin an tlang. Quarter-final-ah Aizawl DFA chu 4-0 a hnehin, semi-final-ah Siaha DFA chu 4-1 in an hneh leh a, final-ah Saitual DFA chu 2-1 in an hneh leh ta a ni. He tournament-ah hian Lawngtlai DFA player Rothangpuia leh V. Lalfamkima te hian goal 5 ve ve an nei.
Lawngtlai DFA coach R. Vanlalpeka chuan, inbuatsaihna neih hunlai hi naupang exam lai a ni a. Champion hi chakin lo thlahlel ve hle thin mah ila, Mizoram angin ka naute tawn hriat hi ka hre chiang, chuvang chuan rilru hi a 50/50 khawp mai, a ti a. Ground hi quarter-final thleng kan khelhna a ni lova, a lo zim zawk bawk a, kan plan kan thlak lo thei lo a ni. Saitual hi an lianin tharum an ngah em em mai a, an inbuatsaihna pawh a rei khawp mai, Pathian vang chauha vannei ve mai mai kan ni e, a ti.
He tournament-ah hian Lawngtlai DFA player Ricky Vanlalhriatsanga, J. no - 13 chu Best Player atan thlan a ni a, goal 6 khungtu Saitual DFA player Isak Lalruatfela, J. no - 11 chu top scorer atan thlan niin, Siaha DFA chuan Fair Play lawmman an dawng bawk.
Lawngtlai DFA hi R. Vanlalpeka (Coach), Lailianchhunga Chinzah (Asst. Coach) leh Edwin Lalhuliana Hlichhal (Manager), Hon. Secretary, LDFA ten an enkawl a ni.
Post a Comment