Lawngtlai, April 8, 2023 : BJP Lai Autonomous District Hqrs: Lawngtlai chuan April 6, 2023 (Thursday) khan BJP din champha vawi 43 lawmna hun a hmang. He hun hi Pu MC. Suiawia Vice President in a kaihruai a, Pu C. Vantlungluaia, Treasurer in hunserh a hmang. Pu NC. Muankima, GS (Organisation) in BJP lo indinchhoh dan leh vawiinnia BJP dinhmun tlangpui a sawi a, BJP hi kum 1980 April, ni 6 khan Atal Bihari Vajpayee ho a din a ni a, tunah chuan Khawvela Party lian leh member ngah ber niin, India ramah Sorkarna fawng vuantu Party a ni mek.
He hunah hian Adviser Pu F. Rohnuna Ex-CEM hnen atangin Lai, Mara, Chakma (LMC) BJP Coordination ten Aizawl hmuna Home Minister Shri. Amit Shah an hmuh thu ngaihthlak a ni a. Pu F. Rohnuna chuan Home Minister Shri. Amit Shah hnenah Sixth Schedule Amendment (125th Constitutional Amendment) chungchanga LMC Co-ordination te Memorandum an pek thu leh Home Minister-in Delhi hmunah a hma lamin Dr. Sambit Patra nen ruahmanna siamin, he mi chungchang hi khunkhan taka sawihona hun thawl zawk an neih tur thu a lo hrilh niin a sawi a. CADC Inthlan lo awm turah Pu F. Rohnuna chuan BJP dinhmun a tha chho zel a, a mala Sorkar siam thei ngei turin hmalak zel a ni, a ti bawk.
He huna thusawitu BJP State Vice President Pu T. Zakunga, MDC chuan BJP chu miretheite innghahna tlak party niin heng mirethei te khaihchhuahna tur hian scheme tam tak a kalpui mek a nih thu sawiin, "Lairam keh hnam dinchhuahna turin BJP hi kan belh a pawimawh a, Dinhmun tha zawka min hlangkai theitu party awmchhun a ni. Chuvangin, vawiinnia kan kawng zawh mek hi a dik a, i zawh zel ang u" a ti a. LADC a fawngvuantu kan nih ve lai khan, kan phak ang tawkin kan hnam thanchhoh zelna turin kan lo thawk a, mahse, tun huna sorkarna fawngvuantu te erawh chuan Hnam thanchhoh lam reng reng an rilruah an dah lo mai ni lovin, a awmsa te pawh Budget-ah tihlan a ni lo hial ta, a rilru nat thlakin, a pawi takzet a ni, a ti. Pu Kungtea chuan LADC Budget Session chungchang sawiin, thawktute hlawh tur pawh pek daih tur a awm tawh loh laiin, hnathar 28 lai lak turin ruahman a ni leh lawi si! Thawktute an khawngaihthlak hle a, ram leh hnam veina tak tak hi LADC a MNF Sorkar hian a nei lo a ni, a lungchhiatthlak takzet ani, a ti.
Post a Comment