Lawngtlai, April 5, 2023 : Vawiin khan a ni li na atan leh a tawpna atan Lai Autonomous District Council Budget Session 2023 neih chhunzawm a ni a, LADC Chairman Pu VL. Hmuaka'n a kaihruai.

Vawiin session-ah hian zawhna pasarih chhan vek a ni a, Official Business pakhat, Voting of the Lai Autonomous District Council Budget 2023-2024 sawiho a, pass a ni bawk.

Lawngtlai Chandmary bialtu MDC Dr. Lorrain Lalpekliana Chinzah zawhna chhangin Revenue changtu EM Pu C. Hrangthianga chuan Zochachhuah leh Longmasu inkar kawngpui laihna turin a paltlang tur ramah kum 2020 atanga 2023 chhungin ram pass pek an awm a, M. Kawnpui ram chhung Model Area-ah kum 2020 chhungin mi 11, kum 2021 ah mi 1, kum 2022 ah mi 20, kum 2023 ah mi 19 te hnenah ram pek a ni a. Tuisentlang ram chhungah kum 2020 ah mi 5, kum 2022 ah 28 pek an ni a, Ngunlinga khua ram chhungah mi 9 hnenah ram pek an ni, a ti.

Pu T. Zakunga, Vawmbuk bialtu MDC zawhna chhangin Pu V. Zirsanga, CEM chuan LADC Golden Jubilee hman taka pawisa hman ral zat chu Rs. 78,64,217 a ni a. Kum 2021-2022 LADC budget ah nuai 10 dah a ni a, kum 2022-2023 ah 42,56,000 dah niin, thawktute hlawh thawh tlingkhawm atangin Rs. 26,08,217 hmuh ni bawkin, avaiin LADC Golden Jubilee hmanna atana pawisa awm chu Rs. 78,64,217 a ni, a ti.

South Lungpher bialtu MDC Pu C. Lalmuanthanga zawhna chhangin Pu V. Zirsanga, CEM chuan LADC Rest House, Diltlang chu kum 2020 a sak niin, estimate amount chu nuai 25 a ni. August 18, 2022 khan hawn a ni, a ti a. Planning & development department atangin facility engmah dah a la ni lova, R&SO ten requirement an siam ang a, tul leh pawimawh ang chu dah turin kan inbuatsaih ang, a ti.

AOC Veng bialtu MDC Pu LR. Dingliana Chinzah zawhna chhangin LAD changtu EM Pu C. Rongura chuan LADC huam chhunga KMMTTPP kawngsirah leivung paih a nih leh nih loh LAD in a hriatpui lo tih a sawi a, engmah hmalakna a awm lo, a ti. Zawhna neitu Pu LR. Dingliana Chinzah chuan "LADC sorkarin helai kawngpui dung leh a chhehvela leivung paih a hriatpui miah lo leh hmalakna a awm lo hi vanduaithlak ka ti a, AOC Petrol Pump leh Mampui road inkarah ringawt pawh leivung tam tak paih a ni" a ti.

Lawngtlai Chandmary bialtu MDC Dr. Lorrain Lalpekliana Chinzah zawhna chhangin Transport department changtu EM Pu BN. Thangpuia chuan kum 2022-2023 financial year chhungin LADC in motor pali a lei, a ti.

South Lungpher bialtu MDC Pu C. Lalmuanthanga zawhna chhangin LADC changtu EM Pu C. Rongura chuan 15th Finance Commssion Rural Local Body Grants 2020-2021 (Untied fund) 1st Installment leh 2nd Installment atangin VC House Chawngte P a sak nan Rs. 469,000 pek a ni, a ti.

AOC Veng bialtu MDC Pu LR. Dingliana Chinzah zawhna chhangin EF&CC changtu Pu V. Zirsanga, CEM chuan Tuipui Ferry kawng chhaka kawng laih avanga Teak kih tluk chu department-in a hria tihsawiin, Council Veng VC ten Nul panna kawng an lai a, Plantation chhunga Teak kung 7 an kit a, heng teak kih tlukte hi department chuan a la a, pawisaah chan tirin miin an khul mek a ni, a ti. CEM chuan Tuipui Ferry kai thlanga Lawngtlai khawpui tuilakna chhehvela mipui ten bawllhlawh kan paih thin chu department chuan a hria a, hmalak nghal niin, department mi kan intir a, leivung an chhunpawn te pawh kan then tir nghal bawk, a ti. CEM chuan bawlhhlawh hi a hranpa taka paih ni lovin picnic-a kalte leh insua kal ten an hnutchhiah niin kan hria a, heng te hi a theih ang anga tihfai a ni, a ti.

Vawiin session tawpniah hian Lai Autonomous District Council Budget 2023-2024 atan nuai 21,603.22 chu pawm a ni a, Supplementary Demand for Grants of Lai Autonomous District Council for 2022-2023 atan nuai 2,393.90 chu pawm a ni bawk.

Tun áš­um session-ah hian zawhna Unstarred 4 leh Starred questions 18 awmin chhan vek a ni bawk a. Pu VL. Hmuaka, Chairman LADC chuan LADC Budget Session 2023 chu tiam chin awm lovin a titawp a ni.

Post a Comment

Powered by Blogger.