Lawngtlai, April 1, 2023 : Lai District Congress Committee chuan Surat Court-in Rahul Gandhi chunga thutlukna a siam chungchangah Politics-a inbeihna a inrawlh thuk hle a an hriat thu an sawi.
Vawiin khan Lai District Congress Committee chuan Lawngtlai Press Club-ah thuthar thehdarhtute kawmin, Lai DCC hruaitu, Mizoram Pradesh Congress Committee a General Secretary Pu H. Zothangliana chuan "BJP kaihhruai Sorkar chu rampumah a theih ang anga inlulingin, mihring dikna chanvo humhalh leh dimdawi kawngah pawh an Party dinchanna turah chuan khua an hmu meuh lo" a ti a. Pu Rahul Gandhi chunga Surat Court in thutlukna a siam pawh hi Prime Minister leh BJP Party thiltih dik loh leh kalphung fel lo Congress Party in a phawrh mualpho hlauh thawnna vanga thiltih a an ngaih thu a sawi a, Prime Minister chu Dictatorship taka rorelna kalpuia, Hindu sakhua dinchanna tura hmalakna dah pawimawh a nih thu te, a bikin India rama hnam tenau leh Kristiante tan phei chuan BJP kalphung chu an hmalam kawng tipingtu a nih thu a sawi.
Lai District Congress Committee hruaitute chuan BJP kal dan chu mimal dikna leh zalenna rahbeh kawngah tihhreh neilo an nih thu te, Hindu nilo tan lek phei chuan BJP hmalakna chu pawm theih a ni lo a ni an ti.
Post a Comment