Lawngtlai, April, 3, 2023 : YLA Council Veng Branch, Lawngtlai te chuan Bazar Veng atanga Siaha inkar kawng siamtu VINCO Construction Limited te chu an hnathawh a chhiat avangin leh khawtlang duh anga hna an kalpui loh avangin vawiin, April 3, 2023 atanga an hna kal lai mek leh hnathawh zawng zawng chhunzawm lo turin an hriattir.

YLA Council Veng Branch chuan he Project hi Rs 28,00,00,000/- (nuai Sanghnih leh Zariat) estimated amount a nih thu an sawi a, hna tan anih phat atangin engkimah DPR leh Drawing a pha lo fai nghal vek a. Side drain hi a chhuat zau zawng Feet 1, a thuk zawng feet 2 leh a zau zawng feet 2 ½ ni tur a nih laiin Drain hlui te ringin a thara hna thawh chhun pawh feet 1 em pawh tling lo a ni ta vek a ni, an ti a. FCI to Bazar inkar kawngpui chu new construction tur niin, kawng hlui zawng zawng nawr khawkin kawng chhuat down vek a, road surface dik leh mawi mam, tuihawk pawh drain a lut zung zung thei tura siam tur anih laiin chhuanlam ho te te hmangin leh pawisa seng tlem theih dan tur ang  berin Vibrator chhuanlamin kawng hlui siam hnan tawp a ni a, hei hi DPR leh dan kalh ani a, hetiang ang problem hi Lunglei leh Aizawl khawchhungah chuan problem awm miah loin kawng tha leh tlo takin siam theih a ni thung a ni. Kawng hlui ringin PWD leh VINCO-in ruahmanna dang siamin chuta ruahmanna kawngpui zau zawng leh chhah zawng turte YLA hruaitu te hriat lem loh in ngawi rengin an lo siam a, chu ruahmanna ang chuan hna thawh a ni, an ti a. Chuta ruahmanna an siam chu; Kawng zau zawng  - 5.5m, DBM - A chhah zawng - 60mm, BC - seal coat - 40mm, Total - 100mm a ni. Hei pawh hi 40% bak dik taka thawh a awm lo niin an sawi.

YLA Council Veng Branch chuan, "kan fai theih lohna bul leh kawngpui tha leh side drain tha hun rei tak ata kan lo awh ve em em leh duh em em chu hetiang mai mai hian min han thawh nawn sak leh hi kan khawtlang leh veng mipuite min zah lohna lian tak leh sum siam nan mai mai bakah min hmang lo ah kan ngai a ni" an ti.

YLA Council Veng Branch chuan chuan Bazar Veng atanga Siaha inkar kawng sial mek chu kum 2018 atanga theihtawp chhuaha an lo sual chhuah a ni tih an sawi a, hna tan a nihin, FCI leh Siaha inkar kawng pawh duhthusam ang ni lo mahsela a hriatthiam theih a, Bazar leh FCI inkar kawng siam hna tan dawn pawhin a bul atangin DPR anga thawk turin vawi duai lo an inhrilh niin an sawi a. heng zawng zawng hi ngai pawimawh lovin, DPR angin hna an thawk lova, hetiang a nih lai hian PWD leh Treasury atangin bill tang miah lovin pawisa an la thei zel tih an sawi a, he thila inhnamhnawih zawng zawng pawh hi an chhuichhuah vek tur thu VINCO neitu Pu R. Vanlalhluna hnenah ziakin an hrilh bawk.

YLA Council Veng Branch chuan a lehkha ngai pawimawh lova, hma an la lui a nih chuan YLA leh khawtlangin a tawp thlengin an do dawn tih leh amah leh a hnathawkte chungah pawh engpawh a lo thleng a nih pawhin an cho chhuah leh an mawh liau liua a ni ang tih Pu R. Vanlalhluna an hriattir bawk.

YLA Council Veng Branch chuan VINCO Construction Limited te stay order pe ve nghal turin Se. EE, PWD, Lawngtlai pawh an ngen nghal bawk a ni.

Post a Comment

Powered by Blogger.