Lawngtlai, March 31, 2023 : Vawiin khan Pu VL. Hmuaka, Chairman LADC kaihhruaina hnuaiah 11th Lai Autonomous District Council Budget Session 2023 ni hnihna neih chhunzawm a ni.
Vawiin session ni hnihnaah hian MDC lo ni tawh boral mi pathum; Zawlsuaknawla, JC. Ngurluaia leh NC. Nguntlunga te sunna hun hman a ni.
Pu T. Zakunga, Vawmbuk bialtu MDC zawhna chhangin Art & Culture changtu EM Pu BN. Thangpuia chuan kumin Hlukhla Kut hmanna atan budget-a dah a nih angin Rs. 450,000 hman a nih thu a sawi. Pu BN. Thangpuia chuan Hlukhla Kut atan department lam inbuatsaihna a that tawk loh thute, department mi leh sa pawhin an ngaih pawimawh nachang an hriat tawk loh thu leh Laifa mipui hrim hrim pawhin Hlukhla Kut hi kan ngaihsan tawk loh thu a sawi.
Pu C. Lalmuanthanga, South Lungpher bialtu MDC zawhna chhangin Education department i/c Middle School changtu EM Pu Andrew Laltlanzara chuan tunhnaia Karlui MIddle School zirtirtu pali lakah pakhatin Lai Language a thiam a, a dang zawngin an thiam lo, a ti a. Hnalak chungchangah Recruitment Rules palzutna a awm lo a ti bawk.
AOC Veng bialtu MDC Pu LR. Dingliana Chinzah zawhna chhangin Revenue changtu EM Pu C. Hrangthianga chuan LADC Price Control Committee-in rate thar a siam angin LADC Area chhungah thil man rate kalpui mek a ni, a ti.
Dr. Lorrain Lalpekliana Chinzah, Chandmary bialtu MDC zawhna chhangin Education department i/c Middle School changtu EM Pu Andrew Laltlanzara chuan Chandmary Comprehensive English School-a Primary leh Middle section zirlai inkalchhawk chungchangah ruahmanna siam mek a ni a, building extend tura hmalak mek a ni, a ti.
Pu C. Lalmuanthanga, South Lungpher bialtu MDC zawhna chhangin Revenue department changtu EM Pu C. Hrangthianga chuan Diltlang ram chhungah Huan ram pass 486 pek tawh a ni, a ti.
Zawhna leh chhanna neih zawh tawh hnuah Pu C. Rongura, EM i/c LAD put luh Report of Enquiry Commission to Thaltlang Village Council tih chu sawiho niin, pawm a ni.
Session hi April 3, 2023, dar 10:00am ah neih chhunzawm leh tur a ni.
Post a Comment