Lawngtlai, April 11, 2023 : Vawiin khan LADC Hall-ah MFA Inter-District Junior (Under-17) Boys Championship 2023 a champion Lawngtlai DFA team te lawmpuina hun hman a ni a. He hun hi Pu V. Zirsanga, CEM LADC chuan khuallian niin a hmanpui.
Pu C. Hrangthianga, EM, SYS Department LADC kaihhruai LDFA team te lawmnaah hian khuallian Pu V. Zirsanga chuan LADC in Football Academy a din atanga hlawhtlinna hmuh chhoh zel a ni chu lawmawm a tih thu a sawi a. District aiawha fehchhuak player te leh coach te inpekna leh leh thawhrimna avanga Mizoram Champion kan ni thei chu lawmawm a tih thu a sawi bawk.
CEM chuan Pu C. Hrangthianga EM (SYS) leh a thawhpui ten Sports Discipline hrang hrangte tan theih tawp chhuahin hma an lakpui thin hi an fakawm ka ti a, Sport Discipline hrang hrangah hlawhtlinna kan hmuh chhoh zel pawh kan beisei a, thalaite leh naupang zawkte pawhin hlawhtlinna chang ngei turin tan ila sauh sauh ang u, tun tuma hlawhtlinna duhawm tak kan nei thei hi a lawm tak zet a, tun hi kan bul tan naah chauh ngai ila, hmalam hunah hei aia hlawhtlinna duhawm zawk, Mizoam mai ni lo, India ram mai ni lo, rampawn thleng pawhin hlawhtlinna chang zel thei turin inbuatsaih sauh sauh ang u, a ti a. Tumruhna nena theihtawp chhuah thinte tan LADC sorkar leh Sports Department te chu kan in hawng a, kan theih chinchinah hma lakpui che u hi kan inhuam a ni, ati bawk.
Vawiin inkhawmah hian LDFA, LDSC leh Central YLA atangin lawmthu sawina leh fuihna thu tha tak tak ngaihthlak a ni bawk.
Post a Comment