April 13, 2023 (Rauthla) : Chelsea chuan nizan khan Champions League Quarter-final match ah Real Madrid chu an bu zawl Santiago Bernabeu-ah an va luh chilh a, sakeiin sakhi seh tuma a um ang maiin an rawn um haw a. Goal 2 an lo phurh tir.
An inkhel
Tan atanga 2mins ah Joao Felix chuan chance nei nghalin, Courtois an a lo dan sak. 11mins ah hnai setsawt atangin Karim Benzema in a shot a, Kepa Arrizabalaga-in a dan sak ve bawk. 21mins ah box chhunga Vinicius-a ball tauh thlak chu Benzema in Real Madrid hmahruaina goal ni turin a khung. 22mins ah Reece James a siam chu Sterling an a khung teuh hle, Courtois ni lo se a goal ang.
Second half ṭan atanga reiloteah Joao Felix leh Luka Modric ten chanve tha tak an nei a, goal ah an chan tir lo ve ve. 58mins ah box thlen hma hretah Ben Chilwell-an Rodrigo titluin, hnawhchuah a ni. 73mins ah bench aṭanga lut Marco Asensio chuan box pawn aṭangin kawh lutukin Real Madrid chakna goal a khung.
Insiamthat ngai Chelsea
Europe-a squad nei chhah leh player manto kawl Chelsea hi tunhnaiah an Puja a fuh hleithei lo. Tunhnai an game 4 ah vawi 3 chak lovin vawi 1 an draw a, hengah goal an thun lo vek. Chak lo rei ngai thei lo Chelsea hian Graham Potter an ban hnuah club enkawl lailawktu atan an legend Frank Lampard an lalut, a hna a hautak dawn. Potter-a kih hnawk a la siamtha thei lo tih lan nan Wolves leh Real Madrid lakah a tlawmpui nghal. Lampard hian a hunlaiin Chelsea tan goal 147 goal khung thei mahse a nau ten goal an khung ve thei tlat lo.
Kil tinah anmahni position theuhah a ber tih theih player an nei. An neih loh erawh goal thun khawl striker a ni. Hei hi an mamawh ta ber niin a lang. Tin, coach hrohrang na deuh, tactic bakah discipline, management leh administration lama mi thiam an ngai bawk niin a lang. Chelsea hian tun dinhmunah striker pangngai Pierre-Emerick Aubameyang leh Armando Broja chiah an nei. Aubameyang hian tun season-ah goal 1 chiah a la khung a, rinrawla neih tlak a ni lo tih a chiang a, Broja lah kum la naupang a ni a, rintlak a la ni lo. Inter Milan lama loan-a kal Romelu Lukaku lah Chelsea nen an nghawngkawl bah a inrual thei lova, ui dawi ang maiin a tal vel mai mai a ni.
Engpawhnise, April 19 ah Stamford Brigde ah Chelsea hian Real Madrid hi an lo mikhual ve thung dawn a, an comeback beisei phawt ang.
Post a Comment