Lawngtlai, April 10, 2023 : YLA Council Veng Branch-in Bazar Veng, Lawngtlai atanga Siaha inkar kawng siamtu VINCO Construction Limited te kawng siama an duh thu a sam loh avanga an hna chawlh san tura an tih chungchangah vawiin khan Lawngtlai Addl. DC Pu Abraham Beirazi Khithie hovin YLA Council Veng Branch hruaitute, PWD hotute leh VINCO hotu ten meeting an nei.
Meeting neih zawh hian VINCO kawng siam te hi a hmunah enin, YLA Council Veng Branch-in an duhthusam loh lai an sawi te chu VINCO Construction Limited te chuan a hma thei ang bera siam an tum thu sawiin, inremna an nei. Stay order an pek chungchangah YLA Council Veng Branch hian meeting an la nei ang.
YLA Council Veng Branch, Lawngtlai te chuan Bazar Veng atanga Siaha inkar kawng siamtu VINCO Construction Limited te chu an hnathawh a chhiat avangin leh khawtlang duh anga hna an kalpui loh avangin April 3, 2023 atangin an hna kal lai mek leh hnathawh zawng zawng chhunzawm lo turin an hriattir a. April 6, 2023 khan kawngpui an siamna hmanrua zawng zawng an base camp-a dah lut vek turin an lo hriattir tawh bawk.
YLA Council Veng Branch hruaitute chuan veng chhunga hmasawnna hnathawhte khawtlang duh loh zawng anga thawh a nih chuan an dodal zel dawn tih an sawi a, khawtlang duhdana hnathawhte erawh an theihtawpin an tanpui zel dawn tih an sawi.
Post a Comment