Lawngtlai, April 28 2023 : Vawiin khan YLA Hall, Electric Veng Lawngtlai ah Electrical Safety Day hman niin Er. Laltlanthanga, SE, LPC chu khuallian ani. Kumin thupui atan hian ‘Electric accident a thlen loh nan, mi tin i fimkhur ang u’ tih ani.
Er. Laltlanthanga, SE Lunglei Power Circle, Lunglei chuan tunlai hian electric avanga chhiatna lo thleng hi a tam em em mai a. Lawngtlai district ah pawh heng avanga nunna chang eng emaw zat an awm hi pawi kan tiin, kan tawrhpui tak zet ani, a ti.
Er. Laltlanthanga chuan, mihring hi kan taksa a lo hnawn hian eletric lamah kan fimkhur a ngai zual em em mai a, hei hian thihna pawh a thlen hial thei ani. Electric avanga accident a thlen chuan Department lama kan hriattir vat a ngai ani, heng harsatna kan thlen te hi Department ah darkar 24 chhungin thunei tute lamah a thlen vat tur ani a. Chutianga thlen anih chuan sorkar pawhin zangnadawmna eng emaw zat a pe thei ani, a ti bawk.
Tunah hian Chawnhu Sub Station pawh 132 KV tura hmalak mek ani a, hna pawh chak taka thawh mek niin kumin chhung ngei hian hman theih tura hmalakna kalpui anih thu a tarlang bawk a. Tin, Chhimtuipui Hydel Project pawh sorkar pawhin a ngaihven thu a sawi bawk a, electric shutdown chungchang ah pawh fimkhur lehzual hmalak dan tur pawh ngaihtuah ani, a ti bawk
Vawiin a Eletrical Safety Day hmanna ah hian khawpui chhunga NGO hrang hrang te, Village Council hrang hrang te leh Journalist te koh khawm niin zawhna leh chhanna hun pawh hman ani bawk.
Electrical Safety Day hi Electric Veng YLA hall ah hman niin Er. Ramdinsanga, EE Power & Electricity Department, Lawngtlai Division in a kaihruai ani.
Mizoram hian tunah huan Mega Watt 60 vel kan pe chhuak mek.
Post a Comment