April 10, 2023 (Rauthla) : Vawiin khan ZPM chhung inkhawm neih a ni a, Pu Malsawmzuala Ralte, General Secretary & AMC Corporator chuan kaihruaiin Upa Zoramthanga, Treasurer, Upa Committee-in hunserh a hmang a; Pu Lalduhoma, MLA, ZPM Leader chuan mi thar 36 lawmlutin thu a sawi.
Pu Lalduhoma chuan, “Kalphung thar duhtu leh kawng dik zawh duhtu Pathianin mi thar duhawm tak tak min pek belh zel hi a lawmawm takzet a ni. Serchhip by-Election leh LMC inthlanah sum thiltihtheihna khenbeh a ni a, hei hian kan ram hawi zawng leh kalphung tur nasa takin a her danglam mek a ni. ZPM hi hnehna changtu kan ni lova, hnehtu chu Pathian leh mipuite an ni. Mipui leh Pathian chaknaah kan innghat a, beiseina kan nei sang hle. MLA inthlan lo awm turah hian kan chak ang em kan hre lo a, inthlan erawh kan nghakhlel hle,” a ti.
ZPM Leader chuan, “Kan thutiam anga kan awm leh lo a nih chuan min chhuahsan leh dawn nia ti ngam awmchhun kan ni a, kan policy leh innghahna hi he ram hian a dampui dawn a ni. Kan ramah project hlamzuih a tam em em a, zirchianna tel lova thil kan kalpui thin avangin kan hlawhchham thin. Sum tam tak a luangral a, chu chu ram mipuiten kan tuar nasa em em a ni. Innghahna tlak eizawnna kan ngaihtuah a ngai a, chu eizawnna erawh chu vantlang tana tangkai leh hlawkpui chi a ni tur a nih a ngai dawn a, sik leh sa, tui hna thlengin a ti chhe tur a ni lo. Ram chhunga leilung hausakna hrang hrang Pathianin a dahte hi tangkai thei ang bera hman chhuah kan tum dawn a, hnam thinlung pu chungin development kan kalpui dawn a ni. Mahni ram tharchhuah hlut leh chawisan kan tum dawn a, intodelh hi kan thupui tur a ni. Sawrkar department hrang hrang enkawl danah te, inkawprem bik leh mumal zawk ruahman a ni a, thuneihna semzai a ni ang a, mi pakhat kuta thuneihna tam tak dah kan tum lo. Corruption tih bo kan tum a, kan ramah hian Corruption kan duh nge duh lo tih kum tawpa inthlan awm turah kan buk ang. Ram mipuite hian eiru hote hi kan ning tawh. Corruption tihbona turin ruahmanna fel tak kan siam tawh a, kan value system thlak kan tum bawk a ni,”a ti.
Pu Duha chuan, “Kan sawrkar a nih chuan Land Reform kan ngai pawimawh dawn. Kan ram leilung awih dan ang zelin leilet, terrace leh thingtlang lo neihna tur ruahmanna kan siam fel vek tawh a, Forest reserve awmna tur thlengin ruahmanna kan siam tawh a ni. Thlai zawng zawng a man rate bituk sa siamin kan lei thei dawn lova, item pali-ah kan insawrbing phawt dawn a, chungte chu Sawhthing, Aieng, Hmarcha leh Hmunphiah te rate awmsa vekin kan inchintir ang a, kan leisak dawn a ni. Mizoram sawrkarin SEDP-a sum an dah cheng vaibelchhe 750 ringawt pawh hi ruahmanna kan siam angin hmang ila kan ram hian kan va thatpui nasa dawn em! Chuvangin kan sawrkar a nih chuan kuthnathawktute kan top priority an ni dawn a, kan intiam ang ngeiin kan leisak ang. Ding chhuak duhten an dinchhuah theihna tur sawrkar kan din tawh dawn a ni,” a ti bawk.
Post a Comment