Lawngtlai Areopagi-a he hun buatsaih hi Lawngtlai DFA Sr. Vice President Pu Elvis Lalthangzuala'n a kaihruai a, Lawngtlai DFA President Pu C. Hrangthianga'n inlawmna thu a sawi. Pu C. Hrangthianga chuan hun rei taka kan lo nghahfak ve thin Mizoram champion nihna chang thei a "Min au la ka chhang ang che" titu kan Pathianin kan district team te hlawhtlinna a chan tir avangin kan Pathian hming chu fakin awm rawh se, a ti a. Lawngtlai DFA in kan player te national-a an khelh theihna turte, Mizoram champion an nih theihna turtein theihtawpin ke kan lo pen tawh thin a, hlawhtlinna tak tak hmuh hi a har thin a, tunah a hlawhtlinna kan chang ta, a ti a. Association angin theihtawpin ke kan pe thin a, amaherawhchu hlawhtlinna tak tak chang tur chuan sum te a lo ngai a, chungah chuan sorkar tha tel lo chuan hlawhtlinna a awm thei tak tak lo a ni. Pu V. Zirsanga kaihhruai kan sorkar hian sport min ngaihtuah pui em em mai a, kum 2022 atangin mumal takin football academy min dinsak a, academy kaltlangin LDFA leh LADC a SYS department pawhin naupangte zirna tha kan pe chhuah ve thei ta a, chumi a rah chhuah thu tun hi kan thleng ta a ni, a ti a, Heng champion team te hi kan academy hnuaia zirte vek an ni a ti bawk.
LADC a SYS department changtu EM ni bawk Pu C. Hrangthianga chuan LADC chuan kumin budget-ah kan academy enkawl chhunzawmna tur sum thahnem tak a dah a, kan sorkar hian kan hmasawn theihna turin ngaihtuahna thui tak a seng a ni, a ti a. Lawngtlaia football hmasawnna kawngah hian Central YLA te pawh an thawhhlawk hle a ni, a ti.
Khuallian LADC Chairman Pu VL. Hmuaka chuan champion team te thinlung taka a lawmpui thu sawiin, footballer tha kan tihte hi ruihtheihthil, zuk leh hmuama insum thei, ei leh in thlenga insum thei, hun vawng dik, nu leh pa thusawi, nu leh pa leh chhungte support-na dawng hi an ni tlangpui. LADC ah sorkar hnaah kan leng vek lo, kan thalaite tan eizawnna tur dang kawl a eng zel, a ti a. LDFA, kan CEM zahawm tak kaihhruai sorkar, SYS EM hmalakna avangte leh Lairam mipuite tawngtaina avanga champion nihna chang thei kan ni a, no mawi rawn hawntute kan ngaisang che u a ni, a ti.
He huna thusawi tu CYLA President Pu Hc. Vanlalruatpuia chuan LDFA in kalphung thar leh kalphung dikin in naupangte an enkawl avangin lawmthu ka sawi a ni, a ti a. CYLA Playground neitu kan nih angin LADC a SYS department leh LDFA te nen hian MoU kan nei a, CYLA hian sport discipline te hmasawnna kawngah theihtawp a chhuah zel dawn a ni, a ti.
Pu Hc. Vanlalruatpuia chuan Sport discipline in a mamawh loh ber chu ruihtheihthil a nih thu a sawi a, "ruihhlo hian min suat nasa hle a, min tichhe hle a ni. Thalaite tan chuan ruihhlo hi kan hmelma a ni. CYLA DRS chuan ruihhlo doin chak takin hma a la a, mipuite tawngtainaa min thlawp tlat turin ka sawm che u a ni" a ti.
CYLA President chuan Lai Cup kan neih thin chu kumina neih tumin hma kan la mek a ni a ti a. Nakuma CYLA in Golden Jubilee an lawmna tur inbuatsaih nan Football leh Volleyball Tournament buatsaih an tum thu a sawi bawk.
Lawngtlai DFA team coach R. Vanlapeka report-a tarlan a nih danin Lawngtlai atangin Player 20 leh official 3 an intir a, Lawngtlai hi Group C ah Khawzawl leh Serchhip te nen an awm ho. Group Match-ah Khawzawl chu 1-3 hneh lovin. Serchhip chu 7-0 in an sawp a, goal difference hmangin an tlang. Quarter final-ah Aizawl chu 4-0 a hnehin, semi final-ah Siaha chu 4-1 an hneh leh a, final-ah Saitual chu 2-1 in an hneh. Lawngtlai player Ricky Vanlalhriatsanga chu best player atan thlan a ni bawk.
Post a Comment