New Delhi, 29th March, 2023 : MP (LS) Pu C.Lalrosanga chuan vawiin khan Union Home Minister Amit Shah chu a pisa ah hmu in an inkawm a, Union Home Minister chuan Pu C.Lalrosanga hnenah hian Aizawl atanga Zokhawsanga Assam Rifles an insawnfel vek tur thu a lo hrilh.

    Pu C.Lalrosanga chuan Pu Amit Shah chu Assam Rifles an insawn chhuah dawn avanga a lawmthu hrilhin, hemi chungchangah hian amah Pu Amit Shah leh Central sawrkar hruaitu dangte pawh vawi engmawzat alo nawr tawh thute a sawi a, Pu Rosanga chuan sawrkar laipui laka an thil ngiat tihhlawhtlin a nih dawn takah hian Chief Minister Pu Zoramthanga pawh a lawm hle a ni tih Union Home Minister chu a hrilh a. Assam Rifles hi hun bituk chhunga insawnfel vek tura an duh thu a sawi chu chhangin Pu Amit Shah chuan an insawn ngei ang a ti.

    Union Home Minister chuan project engemawzat hawng tura Aizawl hi a tlawh tur thusawiin Assam Rifles battalion headquarters a hawn bakah Pu Laldenga Cultural Centre lungphum pawh a phum tur thu a sawi bawk a ni.

    Hemi hma hian Pu C.Lalrosanga hi India President, Pi Droupadi Murmu-i'n MP tanglaite tana Rashtrapati Bhavan a tukthuan, breakfast a buatsaihah a tel ve a. He hunah hian Prime Minister Pu Narendra Modi bakah Central Sawrkar Minister-te leh Parliament In hnih a member-te an tel a ni.

Post a Comment

Powered by Blogger.