Lunglei the 29th March, 2023 – 1stGeneral Election to Lunglei Municipal Council 2023 chu vawiin khan Lunglei Municipality area huamchhunga polling station 44-ah zing dar 7 atanga neih niin tluang taka kalpui mek a ni a. Tlai dar 4 thleng khan vote 29,456 (mipa – 13,670, hmeichhia – 15,786) 72.64% a tla tawh a. Luangmual polling station ah polling hi kalpui chhunzawm mek zel a ni.
Lunglei DMEO Pi Ramdinliani, Lunglei SP Pu Rahul Alwal, Municipal Returning Officer-te Pu Donny Lalruatsanga leh Pu M.Misael, Election kalpui dan endik tura State Election Commission ina a ruat Election Observer pahnih Dr Andrew H. Vanlaldika leh Dr Lalngura Tlau ten polling station-te kal chilhin an enfiah a ni.
Inthlan hi boruak muanawm tak hnuaia neih niin law and order kaihhnawih buaina chhuak a awmlo a ni.
Lunglei Municipal Council inthlanna ah hian Ward 11 awmin Ward 4 (pali) - Ward No II (Serkawn, Zohnuai); Ward No V (Rahsiveng, Sazaikawn, Hauruang); Ward No VIII (Ramthar, Farm Veng); Ward No X (Sethlun, Luangmual, Theiriat, Hrangchalkawn) te chu Hmeichhe tana hauh (Reserved Seats for Women) an ni a. LMC inthlan ah hian a zavaiin candidate 42 an awm a ni.
Inthlanna ah hian October ni 14, 2022-a tlangzarh Lunglei Municipal Council Final Electoral Roll chu hman a ni a. Electoral Roll ah hian vote nei mi 40,548 awmin mipa elector 19,123 leh hmeichhe elector 21,245 te an awm a ni.
Vote chhiar hi April ni 3, 2023 (Thawhtanni) ah Saikuti Hall-ah chawhma dar 10:00 atangin neih a ni dawn a, Vote chhiarna tur hian Counting Hall pahnih ruahman a ni.
Post a Comment