Siaha, March 23, 2023 : Vawiin khan Gov’t Siaha College ah MJA Conference vawi 49-na neih a ni a, MADC CEM Pu M.Laikaw chuan khuallian niin hun a hmanpui.
Khuallian MADC CEM Pu M.Laikaw chuan Sixth Schedule chungchang sawiin inrelbawlna hran nei a, dan leh dun insiam thei a nih avangin development council ang ngawt a nih loh thu a sawi a. Autonomous District Council hi Sixth Schedule hnuaia awm kan ni. ADC nihna hi Mizoram sorkar hian a hrethiam lo. Direct funding hi state atanga inlakhran duhna a ni lo. Sixth Schedule -in thuneihna min pek ang hian thuneihna sang/tam zawk kan mamawh ve tawh a ni, a ti.
He hunah hian MJA President Pu Lalrambuatsaiha pawhin kalkhawmte fuihna thu a sawi a. Thudik ral ve thei lo innghahna atana hmanga inbuatsaih thar turin a chah a ni.
Chawhma inkhawm Pu Lalremsiana Vice President, MJA Gen. Hqrs. kaihhruaiah hian General Secretary report, Finance report te ngaihthlak a ni a, MJA member pahnih sunna neih a ni bawk a. Kumina MJA member lak thar mi 8 te lawmluhna neih a ni bawk.
Chawhnu lamah rorel inkhawm neih a ni a. Hetah hian MJA Gen.Conference vawi 50-na (2025) chu Champhai ah nghah an rel bawk. Thurel langsar zualte :
1. India Hmarchhak a thuthar lakhawmtute nen thawhhona tha a awm theihna tura hmalak.
2. MJA hmalak mekna Press Enclave nei turin tun aia chak zawkin hma lak ni rawh se.
3. Journalist Pension Scheme hi a hlawhtlin thuai thei nan chak zawka hmalak ni rawh se.
Tin, vawiin rorelah hian resolution pahnih; Mizoram sorkarnhian Advertising & Publicity ah tun aia tam zawk sum min dah sak rawh se tih leh Chanchinbu Subcription Bill leh Advertisement Bill awlsam zawk a lak a nih theih nan sorkar in hma min laksak rawh se tih te pass a ni a, MJA danpui siamthatna pawh sawiho a ni bawk.
Post a Comment