March 23, 2023 (Rauthla) : Chhimtuipui ral kawngpui atanga hla vak lova hal hlum nia ngaih Pi Suitei Chinzah, kum 48, Pu Bablu Talukdar, kum 38, New Siaha leh Pu B. Lalthafamkima S/o B. Duhchunga S. Lungpher ruang chu Iana (Ainak) khua atangin vawiin tlai dar 4:00 khan Siaha thlen pui an ni. 

An ruang hi New Siaha West Bazar-ah mipuiin an lo hmuak a. Siaha an an thlenpui rual hian District Hospital-ah post-mortem nghal an ni a. Post mortem zawhah Pu B. Lalthafamkima ruang hi S. Lungpher lamah phurh chhoh  nghal a ni a. Pi Suitei leh Pu Bablu te ruang erawh chu a rualin hmun khatah New Siaha bazar-ah vuina hun hmanzui nghal a ni.

Ruang hmuahna inkhawm hi Upa CL. Hranga, Asst Secretary, ECM New Siaha-in a kaihruai a, ruang a rawn thlen rual hian mipuiin ding chungin an lo hmuak a, Rev Dr. FC. Beichò, ECM New Siaha Bialtu Pastor in tawngtaina a nei zui nghal a ni. An ruang khuhna tur puan hi Pi Pawngpawngi New Siaha, LIKBK Zionthar, Pi Suite thian ten an lo siamsak chuan an khuh theuh a, pangpar hlanna an nei zui nghal theuh bawk a ni.

Pu Pakhaw Chozah, President, MTP Gen Hqrs Siaha, Pu Ngurzamliana Fanai President, MYA Hqrs New Siaha te hnenah atangin thusawi tawi ngaihthlak a ni a. chhungkaw lam atangin Pu J. Ngunchhuma, New Siaha in a nei bawk a, ECM New Siaha kohhran aiawhin thilpek hlanna, Upa Dr R. Hmingthanzuala, Kohhran hotuin a nei bawk. Vuina thuchah Rev V. Danchungnunga, LIKBK New Siaha, Bialtu Pastor-in a sawi a, Thlan lam tawngtaina Rev Dr. FC.Beichò, ECM New Siaha Bialtu Pastor a nei thung a ni. Pi Suitei Chinzah hi LIKBK Zion thar kohhrana lawi a ni a. Pu Bablu hi ECM New Siaha kohhrana lawi a ni.

Tarlan tawh angin Pi Suitei Chinzah, kum 48, Pu Bablu Talukdar, kum 38  New Siaha leh Pu B. Lalthafamkima S/o B. Duhchunga S. Lungpher leh anmahni hruaitu pakhat, an vaiin mi palite chu Dt. 19.03.2023 (Sunday) zing khan Iana khaw piah Chhimtuipui luia thil la turin an kal a. Pi Suitei hi dawrkai a ni a, Bablu hi a dawr nghaktu a ni. Pu B. Lalthafamkima hi Tata Ace neitu leh Driver ni nghal, an hire a ni a. (An thian pakhat, anmahni rawn lamtu hi chu Pi Suitei pasal sawi danin Mindat PDF niin, a rualin an kal hlawm a ni).

Chawlhniaa langa kal tur a insawi an haw tak loh avangin chhungte mangang chuan a tuk Thawhtanni atang khan an zawng ru deuh tawh a. Hetiang dinhmun hi an thlen mai an rin loh avangin Pawl emaw khawtlang emaw pawh an pun lova. Mahse Nilaini thlenga Phone tak ngial pawha an biak theih tak loh avangin an mangang em em  tawh a, khawtlang pawhin ngaihven tanin Nilaini thim dawnah khan Chhimtuipui ral kawngpui atanga hla vak lovah ruang an hmuh thu dawn a ni a. An ruang hi hal a nih avangin tutenge an nih tih a hriat mai thei lova. Tukin zing khan Siaha atangin an chhungte kalin an va fiah ta a, an ruang hi an rawn hawpui ta a ni. An thih chhanah hian thuchiang engmah hriatzuina a awm rih lo.

Post a Comment

Powered by Blogger.