March 24, 2023 (Rauthla) : Mara Thyutlia Py Gen.Headquarters, Siaha chuan Târik 22.3.2023 a Mara ram, Myanmar Border a tualthahna rapthlak tak leh duhawm lo tak a thlen chungchangah pawi an tih thu leh, misual kuttuartute : 1) Pi Biaksuii, New Siaha (Myanmar chhuak) 2) Pu B.Lalthafamkima (Kimtea) South Lungpher 3) Pu Bablu, MRHG, New Siaha te chu thinlung taka an tuarpui thu an sawi.
Vawina thuchhuah an siamah Mara Thyutlia Py Gen. Headquarters, Siaha chuan he thil duhawm lo leh rapthlak tak titute an dem thu sawiin, tun hnuah mi pawisawi lote chungah kut thlakna leh hleihlenna lantir tawh lo turin an hriattir nghal a. "Sawkar leh Police te pawhin, he tualthahna rapthlak tak hi chhui chiang sela, thudik tak hailang ngei tur leh, heta inhnamhnawih misual te pawh man a, an phutawk hremna pe ngei turin kan phut a ni" an ti.
MTP chuan "Myanmar ram buaina avanga kan unau, thisen zawmpui tam tak ten, sahimna zawngin Mararam an lo pan a, MTP leh Mara ram mipuite paw’n theihna zawng zawng nen, anmahni chhawmdawl hnah kan thawh mek zel laiin, hetianga thil duhawm lo lo thleng leh, sual thila inhnamhnawih a, kan ram zalenna leh inremna tihderthawng zawnga chetna a awm zel hi MTP Gen. Headquarters chuan kan duh lo tak zet a, a tul anga do a hmalak zui zel kan tum a ni. Chuvangin kan unau Myanmar mite leh pawl zawng zawngte pawh, tunhnuah chuan engkim ah fimkhur leh insum zual turin kan hriattir a, Ram leh Khawtlang tana mitha, mi tangkai ni tum theuh turin kan phut a ni" an ti.
MTP chuan he harsatna avanga a chi leh hnam ang zawngte, a pawl leh khua ang zawnga boruak tha lo, siam lo turin mipui an ngen thu an sawi a. Misual thiltih a ni tih hre reng chunga, nunau pawisawilote chunga harsatna a thlen, MTP Gen. Headquarters in rem a ti lo tih sawiin, harsatna belchhahtu ni lo turin mi zawng zawng an ngen.
Post a Comment