Lawngtlai, March 28, 2023 : Vawiin khan Mizoram Journalist Association, Lawngtlai District chuan an member thar lawmna Lawngtlai Press Club-ah an nei.
Vawiina Member thar an lawm hi H. Lalruatfela, Jt. Editor, Rauthla niin, March 23, 2023 a MJA Gen. Conference, Siaha-a neih ah khan MJA member atan lakluh a lo ni tawh a ni.
Member lawmna inkhawm hi Pu Lalchharliana, Gen. Secretary, MJA Lawngtlai District chuan kaihruaiin, Pu H. Lalrinmawia, Treasurer, MJA Lawngtlai District-in hunserh a hmang.
He huna thusawitu Pu Lalngheta Ralte, President, MJA Lawngtlai District chuan, vawiina hun kan hman hi MJA Lawngtlai District tan chuan hun chhinchhiahtlak leh mellung pawimawh tak a ni, a ti a. MJA member ni tur hian a kalkawng a thui em em a, member-te hi district-in kan lakuh a ni lova, Gen. Hqrs lakluh a ni a, tunah hian lakluh mai theih tur pawh pali/nga Lawngtlai District-ah hian an awm a ni, a ti. 'Print Media hi kan hniam ta viau a ni lova, social media chak lutuk hian kan chanchinbute chhiar kher ngai lovin a siam ta zawk a, electronic media/social media thang mek hi kan do chuan kan survive dawn lova, kan hman tangkai zawk a ngai a, chu chuan kan chanchinbu pawh a tihlu zual ang' a ti bawk.
He huna thusawitu Pu C. Lalhruaitluanga, District Information & Public Relation Officer, Lawngtlai District chuan, District MJA te nen kan thawhhona a tha hle a, lawmthu ka sawi a ni. Journalist ten zalenna kan nei kan ti a, chutih lai mek chuan kan zalen famkim thei lova, dan hnuaia leng vek kan ni a, Journalist Ethics te kan vawn nun a ngai a. Pawl anga kan kalnaah pawl inkaihhruaina dan pawh kan zawm a ngai a ni, a ti.
MJA member thar Pu H. Lalruatfela chuan, vawiin ni hi ka tan chuan hun ropui leh hun chhinchhiah tlak tak a ni a. Chanchinbu kalkawng ka zawhna kawnga ka nih phak ngai loh tur leh ka mangah pawh ka hmuh phak ngai loh a ni, a ti a. Journalism lamah hian zirsanna emaw degree emaw ka nei lo, Mahse, ka tui tih erawh ka sawi duh. Degree sang tak tak nei, hna sang tak tak nei, tui silova hnathawk thinte ah hlawhtlinna a awm ngai lo. Hlawhtling tur chuan tui chilh a ngai a, at chilh a, teirei peih a ngai bawk, a ti a. 'Journalist te hi kan phak tawka ram hmasawnna leh venhimna kawnga che chhuak thei kan ni. Chu chu kan thuziak leh kan news lak khawm atangin a tih theih a ni. Mahni chanchinbu/news tih lar duhna avanga new thenkhat, a nih bak baka ziak, midangte ngaihnawm tih tur avanga mahni ngaihdan belh a hluar thin. He Yellow Jounalism hi kan tih ve loh ngam a ngai' a ti bawk.
Post a Comment