March 27, 2023 (Rauthla) : Lawngtlai district chhung, Vaseikai leh Longpuighat inkara Tuichawng Lei chu vawiin chawhma lam dar 10:45 vel khan Truck ritphur-in a zawhlaiin a chim.
Kan thudawnna in a sawi danin Truck hian kawngsiamna a hman tur lunghersawm phurin lei hi a zawh a, a lai a thlenin Lei hian zolovin a chim ta a ni. Truck-ah hian Driver, Dashan Madei, Kum-41 s/o Dakhiram, Orissa a mi, BRTF hnuaia thawklai mek a chuang a ni. Lei chim lai hian Lei hlui thlakna tura Lei thar zawk siam hna thawk lai mek zing ami VIJ Company- a thawklai Shaikh Farid, kum-24; s/o Shirazul Hoque, Assam, Lei a hnathawk lai mek a awm chu a chimpui bawk a ni.
Shaikh Farid, VIJ Company hnuaia Labour hnathawk lai hi a mitko kak in, District Hospital Lawngtlai lo panpui a ni a, Motor (Hyva) khalhtu Dashan Madei, Kum-41 hi a malpuiah hliam tuar bawkin, BRO lamin an buaipui tawh bawk a ni. Hliam tuarte hi anmahni an harh that thu Vaseikai OC chuan a sawi a, Medical Exam result a chhuah hma chuan hliam tuarte nat dan tak erawh chiang taka sawi theih mai ala nih loh thu a sawi bawk.
Tuna lei chim hi hun rei tak hman tawh niin, tunah hian Lei chimna chhakah Lei hlui thlakna tur Lei thar dawh hna kalpui mek a ni a. He Lei thar tur siam hna thawh a nih mek lai hian nikum April 6, tlailam dar 5:30 bawr vel khan Lei dawh lai mek hi a lo chim tawh bawk a. Lei a chim lai hian hnathawktu mi 6 te chu a chimpui a, an zinga Pahnih te chu vanneihthlak takin Lei an zawmna thir ah hian Lei lamah tla thla loin an in ham tang thei a, midangte erawh Lei hnuai, Tuichawnglui ah an tla a, Vanneihthlak takin an vai hian chhanchhuah an ni a, an zinga mi 2 chuan hliam na lutuk an neilo a, Vaseikai PHC ah kalpui niin, First Aid pek an nih hnuah an Camp lamah let pui leh an ni a, midang 4 erawh LCMC &Hospital pan pui an ni a, an zinga pakhat Hasar Ali kum 25, Achar Uddin fapa, Assam chu a hliam tuar lovin khaw kar kawngah a boral a ni.
Lei thar dawh mek hi Metres 70 a thui tur a ni a, a zau zawng hi metres 12.8 a ni a, Lei tanga tuipui inkar dan zawng hi metres 17 vela sang a ni. He Lei dawh mek hna hi Border Roads Organisation hnuaiah V.I.J. Engineer & Consultant Pvt.Ltd. New Delhi chuan an thawk a ni.
Post a Comment