Lawngtlai, March 28, 2023 : Vawiin khan Lai Autonomous District Council Board of School Education buatsaihin LADC Conference Hall-ah CEM's Best Teachers Award semna leh kumina Competitive Common Question Examination 2023 buatsaih a, Top 10 a lang zirlaite hnenah Incentive Cash Ward hlanna neih a ni a, he hun hi Pu Andrew Laltlanzara, EM Education M/S & Controlling Authority LADCBSE chuan khuallian niin a hmanpui.
Pu Andrew Laltlanzara EM chuan "Pu V. Zirsanga CEM kaihhruai sorkar chuan lang thei leh lang thei lo lamah pawh, Ram leh hnam tan theih tawpa thain a thawk thin a, zirna chungchangah pawh nasa takin hma a la mek zel a, chuvang chuan chuan vawiin hun pawh hi hmang thei kan ni. Ram leh hnam hmasawnna bulpui leh changkanna chu Zirna lama hmasawnna hi a ni tih hriain, theih tawp chhuahin hma kan la zel dawn a ni" a ti.
Khuallian chuan Education & Human Resource Department-in zirna kawnga an hmalaknaah zirna in te a tul ang zela siam that sakin, School mamawh hrang hrangte ngaihtuah sakin hmasawnna pawh an hmu chho mek zel tih sawiin, "Sorkar in theih tawp a chhuah thin ang bawkin, vawiina Zirtirtu lo kalte pawh hian, in thawk tha lo ni lovin, thahnem ngai takin tan la thar leh turin ka sawm che u a ni. Eizawnna anga thawk lovin, Zirna tha neih hi kan ram leh hnam tan hian a pawimawh avangin inpekna thar nen theih tawp chhuaha tan la thar sauh sauh turin ka sawm che u a ni" a ti bawk.
Pu Andrew Laltlanzara EM chuan zirlai lo kal khawmte hnenah, Zirna kawngah In elna thianghlim neih nachang hriat a tul thu a sawi a, "kan Zirna tibuai theitu eng pawh nise tlanchhiat san ngam a tul chang a awm thin a, Kohhran leh Khawthlang thilah pawh inhman dan tawk chin kan hriat a tul thin" a ti.
Vawiin hun hi Pu Zaithanga, Secretary LADCBSE chuan kaihruaiin, CEM's Best Teachers Award (Middle School) chu Pi F. Sangkili D/o F. Tialkhuaia (L), Headmistress, Govt. Sangau MS hnenah hlan a ni a, CEM's Best Teachers Award (Primary School) chu Pu H. VLMSD Liangchhunga S/o H. Thathrina, Headmaster, Cheural PS III hnenah hlan a ni a. Kumina Competitive Common Question Examination 2023 buatsaih a, Top 10 a lang zirlaite hnenah Incentive Cash Ward hlanna neih a ni bawk. CEM's Best Teacher Award hian lawmman tangkafai Rs. 50,000/-(Singnga) leh Certificate mawi tak a keng tel a, Top - Ten Zirlai te hnenah Citation leh tangkafai hlan a ni bawk.
Post a Comment