March 02, 2023 (Rauthla) : Mizorama eiruk thubuai nei lai tlanbo ta Musta Gur Rahman, Guwahati chu a tlanbona Delhi ah February 24, 2023 khan man a ni. Anti Corruption Bureau (ACB) chuan vawiin (2.3.2023) hian Aizawl an rawn thlenpui hman beisei a ni. 

ACB-te hian complaint an dawn bawhzuiin kum December 3, 2015 khan MAMCO sum cheng nuai 268 eirukna thubuai an ziak lut a. Thubuai hi chhuizuiin, sum tihchingpen a nih laia MAMCO Dy. Manager Lalremthanga leh a consultant Musta Gur Rahman chu an inhnamhnawihah puh an ni.

Musta Gur Rahman leh Lalremthangate hi man an ni a, interim bail hmanga chhuah lailawk an ni a. A hnuah Gauhati High Court, Aizawl Bench chuan bail dilna hnawlin, court hniam zawka kal turin order a siam a. Lalremthanga chu Special Judge (Prevention of Corruption Act) chuan ni 22.11.2022 khan thiam loh chantirin, kum 5 jail tang tur leh cheng nuai 5 chawi turin a hrem. Gur Rahman manna tur (warrant of arrest) pawh a ti chhuak nghal a. Hetih lai hian Musta Gur Rahman hi a tlan bo ta a ni.

ACB te chuan Gur Rahman hi man tumin an zawng reng a, Hnamdang Mizorama IPS officer lo thawkte puihnain Delhi-ah zawn niin man a ni ta a, vawiin hian Aizawl rawn thlenpui hman beisei a ni a, Special Court-ah hruai nghal a ni ang. 

Post a Comment

Powered by Blogger.