March 01, 2023 (Rauthla) : Zo Reunification Organisation (ZORO) chuan Manipur sorkarin Zofate chenna hmun hrang hrang, anmahni remtih thlap ni lo a, reserved forest-a puang a, an in leh lo tichhia a, hnawhchhuah a ṭan chu an dem takzet tih sawiin, theihtawp chhuaha dodalin hma an la dawn tih an sawi.

"Manipur sorkar thiltih hi hnam lian zawkin a tê leh tlêm zawkte a pâwngnêk leh palzutna a ni a, insawithiam ngaihna awm miah lo human rights palzutna a ni. Hetiang thil Zofaten kan tawk leh ṭhin hi ZORO chuan a duh lo hle" an ti a. Tuna Manipur state-in a huamchin hi Manipur hnam lian ber Meitei ram vek a ni lo tih an sawi a, chuvangin, Zofate hian kan ramah chuan Manipur sorkar zah leh ngaihpawimawh kan phu takzet a ni" an ti.

ZORO chuan Zofate an chenna hmun a ṭanga hnawhchhuah chu titawp nghal turin Manipur sorkar an phut tih sawiin, tuna a hnawhchhuahte pawh hi an awmna hmun pangngaia in leh lo dinsak leh dahlet leh vek ngei turin an phut tih an sawi bawk..

Post a Comment

Powered by Blogger.